_سماح :تصوري ياعزيزة فاروق عاوز يتجوز البت المطلقة اللي اسمها أماني وقال ايه بيحبها أوي وبيحبها جدًا الواطي ماأنا كنت قدامه وكنت بقوله مستعدة اسيب جوزي واسيبله عياله واتجوزه هو وأعيش معاه …..
_عزيزة :ياسماح فكك من الموضوع ده بقي وخليكي في بيتك وجوزك وولادك أحسن وأفضل فاروق ده راجل احنا بنشتغل عنده في الشركة وهو مديرنا ورئيسنا مش أكتر فاياسماح ماتبصيش لفوق وخليكي في حياتك ده واحد عاوز يعيش لنفسه ويدلع ومعاه الفلوس مش عارف يوديها فين فحابب يتمنظر بيها مع البنات والحريم فبلاش تلعبي بالنار علشان ماتجيش تولع فيكي أنتي في الأخر …..
_سماح : والله اومال البت المطلقة دي هي اللي مش بتلعب بالنار وباصة لفوق أوي وبعدين اشمعنا هي اللي عجبته يعني ما أنا قدامه بقالي كتير وياما اتحايلت عليه ومستعدة اعمل أي حاجه علشانه بس هو يوافق بيا ويرضي ده أنا رهن إشارة واحدة منه …
_عزيزة :طب أنتي عرفتي منين إن هو عاوز يتجوز أماني …..
_عزيزة :سمعتهم بنفسي وهما بيتكلموا مع بعض وهي قال ايه ماصدقت علي طول ودابت فيه وفي ثواني من غير أي كلام راحت موافقة جوازة بقي ماكانتش تحلم بيها وهي مطلقة بقالها سنتين مش لاقية اللي يبصلها ولايعبرها …..
_فلاش بااااك:
سماح واحدة موظفة في شركة برمجة كمبيوتر وإلكترونيات هي وعزيزة من ضمن الزملاء اللي شغالين كلهم في القسم مع أماني …..
سماح أول ماشافت أستاذ فاروق بقت هتموت عليه راجل بقي مال وجمال وأنيق ومركزه كبير رئيسهم كلهم وهي جوزها راجل غلبان وعلي قده وبيشتغل في سوبر ماركت يقف فيه بالأجرة فعايشين عيشة بسيطة وطبعاً مرتب سماح بيساعد لانه مرتبها كبير فعلشان كده دايما كاسرة نفسه وبتعايره إن هي اللي شايلة البيت لكن للأسف هي عندها الدنيا مال وفلوس وجاه ماتعرفش إن الستر والرضا والصحة والطيبة والإحترام أهم من كل ده والفلوس ماهي إلا وسيلة نعيش بيها في حياتنا بس بما يرضي الله وحلال ربنا والرضا بالرزق اللي قسمه لينا حتي لو كان قليل وبسيط …..
سماح كانت ياما بتتحايل علي أستاذ فاروق وهو يرفضها لأنها ماتعجبوش وكمان بيستقل خيرها لما هي بتعمل كده ومش عاوزة جوزها ولاعيالها يعني هتعمل معاه هو كمان نفس الحكاية بعد كده لو لقت قدامها راجل أحسن وأغني منه وكمان هو مش بيرمي ماله ولافلوسه هو عارف إن هي عاوزة تتجوزه علشان فلوسه وماله وتعيش معاه علشان نفسها وتبقي اسمها حرم المدير فطبعا بيرفضها ومش بيديها وش وهي بيتحرق دمها أكتر وأكتر ومش بتبعد بالعكس بتفرض نفسها عليه أكثر…..
وفي يوم ماكان داخل لأماني يكلمها كانت هي عاوزة تروح وراه تكلمه تاني بس لما لقته بيكلم أماني بحنية وقفت ورا باب المكتب تسمعهم وسمعت كل كلامهم وكل اللي قالته أماني ليه والدم بقي يغلي في عروقها إزاي يبص لأماني وهي اللي بتتحايل عليه من زمان يرفضها واستنتهم لحد مامشيوا وبعد كده مشيت هي وكانت إتاخرت واتحججت لجوزها وولادها إن تأخيرها ده كان ضغط شغل وبقت مش علي بعضها ومتغيرة معاهم ومش طايقة نفسها ولا طايقة أي حد قدامها وفكرت إنها لازم توزعهم يسافروا يشوفوا أهلهم علشان تعرف تكلم عزيزة صاحبتها وتحكيلها لأنهم صحاب الروح بالروح بس طبعاً عزيزة أحسن منها وشايفة شغلها وحالها وبيتها وجوزها وولادها ودايما تنصحها إنها تبعد عن سكة الأستاذ فاروق لانه مش سهل وينفات ليه بلاد بس للأسف سماح مش بتسمع كلامها ….
_باااااااااك “انتهي الفلاش باااااااك”:
سماح قالت علي أماني كلام بالغلط وظلمتها علشان تسوء سمعتها وتطلع صورتها وحشة قدام الناس في الشركة وبدل مايكون حد معاها وواقف جنبها وفي صفها لا الكل يبقي عليها ويكرهها لأن طبعاً سماح غارت منها اشمعنا هي اللي أستاذ فاروق حبها وفكر يتجوزها ……
عزيزة صدقتها بحسن نية وردت عليها وقالتلها :
“معقول كل ده يحصل من أماني دي بت غلبانة وفي حالها ”
_سماح :أقولك ايه ياما السواهي دواهي بقي وبعدين عاوزة تتجوز وخلاص هي لاقية حد يعبرها ولايقول عليها ماهي بقالها سنتين مطلقة …..
_عزيزة :خلاص ياحبيبتي سيبك منهم بقي وخليكي في بيتك وجوزك وولادك أحسن طب دي واحدة مطلقة ومافيش وراها حد يقولها الصح من الغلط وكمان مش علي ذمة راجل ولامعاها عيال يعني عاوزة تتجوز وتتستر وخلاص وبكرة هو كمان كعادته يزهئق منها ويسيبها ويرميها بعد مايتجوزها شوية ويأخد اللي هو عاوزه منها……
_سماح :نعم اسيبني منهم ده أنا هوريهم الاتنين اصبري عليا بس ….
_عزيزة :برضه ياسماح مافيش فايدة يعني لا أنا ولا أنتي قد فاروق ده ….
_سماح :أيوة برضه ياعزيزة وبعدين بقي أنا هبقي قده وأقوي منه وعليا وعلي أعدائي يلا سلام ….
_عزيزة :الله يسلمك ياسماح …..
