بعد موت أبويا، عمي أخدني رباني وكان عنده بنت مكنش بيفرق بيني وبينها في المعاملة. وعشان أرد جميله بعد ما تعب، كان لازم أتجوز بنته رغم أني مكنتش بحبها، بس حسيت إن ده واجب عليه لأنه رباني ٢٠ سنة. وفعلاً، بعد جوزي من بنته بشهر، عمي مات، ووقتها مسكت كل حاجة بداله. بس اللي كان مضايقني بنته؛ حسيت أنها عبء عليا بجوزي منها، فقررت أني مخلفش منها عشان مايكنش بينا رابط، وأعيش حياتي وأشوف واحدة تانيه أتجوّزها، بس الأهم أني أحبها.
عدت الأيام وعملت تعديلات في الشركة، وجبت موظفين انتمائهم ليا، وجبت سكرتيرة جديدة اسمها شوق، وما أدراك ما شوق! جمال، رقة، كل حاجة حلوة اتجمعت فيها. وحبيتها بطريقة بقى كل كياني معاها؛ بقت تاخد أعلى مرتب في الشركة، كنت بعمل شغلها بدالها عشان ماتتعبش، وجبتلها مساعدة كمان تحت إيدها. الموضوع كبر وبقيت أنزل أشترى معاها اللبس من أفخم الأماكن بحجه أنها بتحدث معايا الاجتماعات وشكلها من شكلي.
وفي مرة، كنت ماشي معاها في المول بتشترى لبس وشوفت مراتي في نفس المكان. حاولت أتجاهل مراتي، لكن هي جت كلمتني وسألتني بعمل إيه؛ قولتلها السكرتيرة بتجيب لبس عشان عندنا شغل، والعشا ده مهم ولازم مظهرها يبقى مهم. لقيتها سألتني: “وليه ماقولتليش أجي معاك؟” حاولت اتحجج كتير، لكن حسيتها ماقتنعتش، وأنا كنت رافض وجودها عشان شوق. لكن هي فرضت نفسها عليا وجت معايا العشا.
لكن غصب عني كان اهتمامي بشوق أكبر، لأن وجودها معايا كان منسيني وجود مراتي. كنت بفتحلها باب العربية وأحنا ماشيين، كلامي كان موجه ليها هي، مكنتش مدي مساحة لمراتي تتكلم أصلاً. ورغم كده، مراتي فضلت موجودة معانا، حتى شوق لاحظت ده ووشوشتني في ودني وقالتلي: “هي مراتك مش بتغير معقول؟”
وقتها حسيت الكلمة جت على كرامتي، وحاجة جوايا قالتلي أني أتعمد أقرب أكتر من شوق قدامها عشان أخليها تغير. الأكل نزل وبقيت أهتم بشوق بالأكل اللي بتحبه وأحطه قدامها وأتجاهل وجود طيف تماماً. ولما اللي كانوا حاضرين افتكروا إن شوق مراتي، محاولتش أبرر ولا أصحح؛ يمكن من جوايا كنت عايز فعلاً شوق تبقى هي مراتي.
خلصنا العشا ووصلت شوق، وبعدها روحت مع مراتي. حاولت تكلمني لكن أنا كنت صريح معاها وقلتلها الحقيقة: أني بحب شوق وعisت أتجوّزها، وأني متجوزها هي عشان خاطر جميل عندي، بس أنا حاسس أننا غير مناسبين لبعض وأنا عايز أعيش حياتي.
وفعلاً عدت الأيام وطلبت شوق للجواز ووافقت، وقررت أعيش في الفيلا عشان ماسيبش طيف لوحدها عشان وصية عمي. وفعلاً اتجوزنا، وشوق عاشت معايا في الفيلا وسابت الشغل وكانت هي الهانم في الفيلا وأنا كنت شايف إن يليق عليها أکتر من طيف. كنت آجي من الشغل نقعد سوي، حتى الشغالين كل أكلهم وشربهم واخدين راحتهم. كانت تدلع عليا قصاد طيف بشكل مبالغ فيه، كنت شايف إن ده حقها ومش كفاية وافقت تتجوز على ضرة.
فضلنا كده لحد ما جه اليوم وتيف تعبت، وجت واحدة صاحبتها عشان تزورها، لكن شوق قالت لها بلطف بارد: “محدش غريب يدخل هنا ده بيتي”. وقتها حبت طيف تدافع عن صاحبتها، لكن شوق قالت لها: “وجودك هنا عبء علينا أصلاً وانا مستحملاكي”.
اتصلت بيا وجيت، ولقيتني بهاجمها عشان شوق، واتهمتها أنها مش متقببة وجود شوق وأنها مالهاش رغبة في التفاهم. الكلام ده اتقال، وكانت شوق قاعدة واثقة من نفسها وبتتفرج على اللي بعمله عشان أرضيها.
لكن اللي طيف عملته وقتها صدممني؛ مسحت دمعة يتيمة نزلت على خدها، وبصتلي بنظرة خلت دمي يتجمد لثواني، نظرة هادية ومفيهاش لا انكسار ولا قهرة، كأنها بتشوفني لأول مرة على حقيقتي. طيف رفعت راسها وقالت بصوت هادئ، ثابت وواضح: “ده بيت بابا يا أستاذ.. ده بيتي أنا قبل ما يكون بيتك، ومن حقي أجيب اللي أنا عايزاها وقت ما أحب، ومفيش مخلوق له حق يمنع حد من بيتي!”
ضحكت شوق باستهزاء، وقالت بصوت مستفز وكلها غرور: “أبوكي مات يا حبيبتي، والفيلا دي وكل اللي فيها بقوا بتوع جوزي.. يعني انتي هنا مجرد ضيفة، ولو مش عاجبك الباب يفوّت جمل!”
حسيت الكلمة وسعت أوي من شوق، بصيت لطيف مستني أشوفها تنهار أو تعيط، بس اللي شفته في عيونها رعبني أكتر؛ ابتسمت طيف بسخرية وجع، وبصتلي أنا وقالت: “أبويا مات.. كنت فاكره إنه سابلي راجل يحميني، وأنا للأسف اتجوزت عيل مايعرفش يعني إيه جميل بابا عمله معه”.
الكلمة ولعت نار جوايا، وقدام الشغالين كلهم وشوق قاعدة بتبتسم، قربت منها بغضب ورفعت صباعي في وشها: “انتي اتجننتي؟! نسيتي نفسك ولا نسيتي مين اللي شايلك وسايبك هنا بعطفه؟”
طيف مردتش عليا، اكتفت إنها لفت ضهرها وطلعت السلم بخطوات هادية جداً، ومن غير ما تلتفت وراها رمت كلمة واحدة سمعتها كويس: “بكرة تعرف مين اللي ضيف عند التاني يا ابن عمي.. والجميل اللي أنت فاكر نفسك رديته، لسه حسابه مفتوح”.
الكلمة قادت النار في عروقي، وعمت عيني عن أي عقل أو أصل. طلعت وراها السلم ووقفت قدامها وصرخت في وشها: “انتي مالكيش أي لازمة هنا! فاهمة ولا لأ؟ كل شغل أبوكي وكل قرش دخل جيبك أنا اللي ماسكه بإيدي ومن تعبي، لولايا أنا ووقفتي كان زمانك مش معتمدة على نفسك!”
شوق وطت بجسمها بابتسامة واثقة، ورجعت خصلة من شعرها ورا ودنها، بينما طيف سندت على الحائط ببطء، ورفعت عيونها ليا، ورغم الألم النفسي اللي كان باين في حركة جسمها، عيونها كانت باردة لدرجة تخوف، وقالتلي بهدوء غريب: “الشارع أرحم من بيت فيه واحد ناكر للجميل زيك.. بس متستعجلش، اللي رفعك قادر ينزلك، وساعتها مفيش حاجة هتنفعك”.
كلامها نزل عليا، حسيت إن كبريائي اتهز قدام شوق والشغالين اللي كانوا واقفين يتهامسوا ومصدومين من اللي بيحصل. لفيت وشي للخدم، وبصوت عال صرخت فيهم: “سمعتوا كلكم؟! الست دي من اللحظة دي محدش يتعامل معاها بطلبات أو يحاول يضايقني.. والسامع يبلغ الغايب، اللي هلمح فيكم بس بيخالف قراري هطرده في نفس اللحظة!”
الخدم كلهم نكسوا راسهم في الأرض، ومفيش حد قدر ينطق بحرف، وكان في عيونهم شفقة واضحة عليها.
شوق قامت وقفت جنب مني بدلال، وحطت إيدها على كتفي بحركة كلها غرور وانتصار، وبصت لطيف وقالت بنبرة مستفزة: “أصل اللي ما يعرفش مقامه لازم يتربى، والبيت ده خلاص بقى له ست واحدة بس”.
طيف مقالتش ولا كلمة.. سندت بإيديها وقامت بالعافية، جسمها كان بيرتعش من التعب، بس وقفت صلبة ضهرها، وعدلت هدومها وهي بتص في عيني مباشرة من غير ما تنزل رمش، وبعدها سابتنا وطلعت على فوق بخطوات تقيلة، وقفت باب أوضتها بالمفتاح من جوة بهدوء تام، هدوء حسيت إنه هدوء العاصفة.
فضلت طيف مقفول عليها باب أوضتها، وأنا مسكت إيد شوق وطلعنا لجناحنا، وصوت ضحكتها الرنانة كان مالي أركان القصر كله. كل ما كنت أسمع ضحكتها، كان قلبي يرفرف وأحس إني ملكت الدنيا، نسيت طيف تماماً، ونسيت الإهانة وكل اللي عملته فيها، العشق كان عاميني لدرجة إني شفت قسوتي رجولة ودفاع عن هيبتي وهيبة الست اللي قلبي اختارها.
كنت فاكر نفسي مسيطر على كل نفس بيخرج في البيت، وكنت متخيل إن ولائهم ليا عشان القرشين اللي بديهملهم، لكن مكنتش أعرف إن الحقيقة ورا ضهري كانت تانية خالص. طيف مكنتش ساكتة، والخدم اللي كنت متخيل إن ولائهم ليا، كان أصلهم ووفائهم لعمي الله يرحمه ولبنته اللي كبرت قدام عيونهم.
من ورا ضهري، كان الكل في ضهر طيف؛ بمجرد ما يدخل الليل ويتقفل باب جناحي أنا وشوق، كانت الخدامة الكبيرة تطلع على طراطيف صوابعها بصينية الأكل الدافية، ومعاها العصير والمياه، يدخلوا عندها الأوضة يطمنوا عليها، يمسحوا دموعها ويطبطبوا عليها، وهي تستقبلهم بابتسامة هادية وثبات يحير. مكنتش بتطلب منهم أكل، كانت بتطلب منهم حاجة تانية خالص.. كانت بتخليهم يوصلولها ورق مهم من مكتب أبوها، وتليفون قديم مش متسجل، وحركات وترتيبات كانت بتتم من ورا ضهري وأنا غرقان في بحر شوق ودلعها، مش داري إن السجادة بتتسحب من تحت رجلي خيط ورا خيط.
في الأوضة المقفولة، كانت طيف قاعدة على السرير، ماسكة التليفون القديم، وعيونها مفيهاش ذرة دموع، بل فيها نظرة عزم وتصميم للي ناوياله. أول مكالمة عملتها كانت لعمتها؛ الست الكبيرة الصعيدية اللي كلمتها سيف، حكتلها بكل هدوء عن كل اللي حصل: المعاملة، وتطليق صاحبتها، وجوازتي من شوق وعيشتها في قلب بيتها.
