لم ينطق رائف بكلمة يضيق ما بين حاجبيه بتفكير وشرود للحظات مرت عليها كالدهر حتى تحدث أخيرًا يسألها باقتضاب: “هو ده بقى السبب اللى خلاكى تجرى تعيطى بالشكل ده؟”
أومأت برأسها بذنب تهمس: “غصب عنى، بس اوعدك حضرتك دى هتكون اخر امر هعمل كده.”
نهض رائف من مقعده قائلًا بهدوء: “من ناحية هتكون اخر مرة، فدى فعلا هتكون اخر مرة.”
اتسعت عينيها برعب تسرع بالنهوض خلفه تلحق به تمسك بذراع بذلته توقفه قبل أن يتوجه إلى مكتبه هاتفة برعب وخوف: “ارجوك يا رائف بيه صدقنى، دى اخر مرة هتحصل، ولو سمعت ايه بعد كده من اى كان مش هتحرك من مكانى، بس ارجوك انت متعرفش انا محتاجة شغلى ده اد ايه، انا ممكن كده اطرد من بيتى.”
ضاقت عينيه يسألها باهتمام: “تطردى من بيتك ليه؟”
اخفضت زينة رأسها تهمس وهي مازالت ممسكة بذراعه كما لو كانت تستمد منها قوتها قائلة بحزن: “قبل مابابا وماما يموتوا اتكسر عليهم ايجار كذا شهر، وانا المفروض اللى ادفعهم والا صاحب البيت هيخرجنى برة الشقة.”
ساد صمت قاتل بعد حديثها هذا قاومت خلاله دموعها من السقوط أمامه فيكفيها ذل ما حدث حتى الآن فلن تزيده بجعله يرى دموعها أيضًا.
سمعت صوته الهادئ ينادي باسمها فرفعت إليه وجهها بتساؤل ليحدثها برقة كما لو كان يحدث طفلة أمامه: “سيبى دراعى يا زينة.”
نظرت إليه بتساؤل عدة ثوانٍ لا تدري عن ماذا يتحدث حتى أشار هو بحاجبيه ناحية يدها المتشبثة بقوة بذراعه لتشهق تبعد يدها عن ذراعه سريعًا كما لو كانت نار لسعتها ليبتسم هو بضعف حين رأى خوفها هذا يتجه ناحية مكتبه مرة أخرى يجلس فوق مقعده ومازالت على شفتيه تلك الابتسامة، تراه يتناول الهاتف مرة أخرى يتحدث إلى الجهة المقابلة مستعيدًا جديته سريعًا قائلًا بجمود: “شاهى، ابعتيلى رئيس قسم الارشيف وشئون العاملين حالًا.”
فور نطقه لكلماته تلك شعرت بعالمها ينهار من تحت قدميها فمن المؤكد يريدهم الآن حتى ينهي عملها هنا، فما حاجته لجالبة للمشاكل مثلها داخل شركته؟
شعرت بدموعها تتكاثر بداخل عينيها فلم تستطع هذه المرة مقاومتها لتتركها تتساقط باستسلام على وجنتيها سريعًا فهمست بتلعثم وصوت متحشرج تتجه ناحية الباب تبغى الخروج فورًا: “عن اذن حضرتك، انا…”
أوقفها صوته هاتفًا فيها بقوة: “استنى عندك، من اذنلك بالخروج؟ تعالى هنا حالًا.”
تسمرت زينة مكانها بخوف تلتفت إليه ببطء، تراه جالسًا براحة فوق مقعده يشير إليها بالتقدم إليه فتقدمت منه ببطء كما لو كانت مغيبة تقف أمام مكتبه لعدة لحظات صامتة قبل أن يتحدث هو بصوت عملي قوي شديد الجدية: “تانى مرة متتحركيش من مكانك الا بأذنى، فاااهمة؟”
نطق كلمته الأخيرة بحدة وصوت عالٍ إلى حد ما للتهب فزعًا وأسرعت تهز رأسها بالموافقة ليكمل هو بجدية وهدوء نسبي: “من بكرة تيجى هنا تستلمى شغلك مع شاهى، هتكونى مساعدة ليها، واظن بكده مبقاش فيه مشكلة، ويااريت مسمعش عن اى مشاكل تانية، والا زينة ساعتها انا هضطر…”
ترك باقي جملته معلقة تاركًا لها هي إكمالها لكنها ظلت واقفة أمامه تتسع عينيها بذهول وصدمة فاغرة لفمها بقوة ليهتف بها: “زينة، سمعتى كلامى ولا؟”
أفاقت من ذهولها هامسة: “تقصد انى هشتغل هنا فى مكتبك حضرتك؟”
رائف بهدوء وقد أدرك ما تمر به: “ايوه يا زينة، من بكرة هتستلمى شغلك هنا، واظن كده ابقى اديتك اكتر من فرصة، ودى اول مرة اعملها مع اى حد، ويااريت متخلنيش اندم على ده.”
زينة بسعادة جعلت دموعها تتساقط مرة أخرى ولكن هذه المرة من سعادتها: “لااا اوعد حضرتك انى هكون عند حسن ظنك، وبجد انا مش عارفة اشكرك ازااى.”
ابتسم رائف ببطء قائلًا: “تشكرينى بانى مندمش على قرارى ده، ويلا امسحى دموعك دى، وتقدرى تروحى النهاردة بدرى.”
أتبع حديثه بمد يده لها بمنديل ورقي فأسرعت باخذه تمسح به وجهها هامسة بشكر له، ما إن انتهت حتى استئذنت منه للخروج فأذن لها بإشارة من يده كموافقة فتحركت باتجاه الباب لكنها توقفت مكانها مرة أخرى تلتفت إليه تهمس بتردد: “رائف بيه، بخصوص زمايلى فى المكتب واللى حصل، ممكن حضرتك يعنى متعملش…”
قاطع رائف حديثها بحزم قائلًا: “اتفضلى يا زينة، وملكيش دخل بالموضوع ده.”
ابتلعت زينة لعابها بصعوبة تهز رأسها بالموافقة تغادر مسرعة تغلق الباب خلفها تاركة رائف ينظر أمامه بشرود وذهنًا غائبًا.
داخل فيلا رائف الحديدي مساءً
جلس رائف يجاور صديقه ياسر أمام إحدى الشاشات العملاقة يلعبون إحدى الألعاب الإلكترونية بحماس شديد لبعض من الوقت كانت تتعالى فيه صرخات حماسهم فقط حتى انتهت اللعبة بفوز رائف ليهتف ياسر بإحباط: “انا مش عارف انا ايه يخلنى العب معاك وانا عارف اخرتها كل مرة.”
ضحك رائف بصخب هاتفًا بمرح: “علشان كل مرة بتفكر انك هتقدر عليا ومش قادر تقتنع ان استحالة حد يغلب رائف الحديدى.”
زفر ياسر بخنق قائلًا بغضب زائف: “مااشى ياعم الخطير، اتعلمنا الدرس.” ليكمل بجدية هو يتراجع في كرسيه براحة: “ما قلتليش عملت ليه كده فى كل اللى فى قسم الارشيف؟ كل ما اسألك تغير الموضوع.”
ابتسم رائف ببطء قائلًا ببرود: “مش مهم عملت كده ليه، المهم عندى اللى يغلط لازم يتعاقب.”
زفر ياسر بحنق قائلًا بقلة صبر: “مانا عارف انهم اكيد غلطوا، انا بقى عاوز اعرف هما غلطوا فى ايه، ومتقوليش مش مهم تعرف، هاااا عملوا ايه؟”
قص عليه رائف ما حدث صباحًا بلا اهتمام وما إن انتهى حتى هتف ياسر بقوة: “انت اتجننت يا رائف؟ تخصم من كل القسم شهر علشان كلمتين اتقالوا من بنت متعرفش ان كانت بتقول الحقيقة ولا لا.”
أغمض رائف عينيه قائلًا براحة: “وتعتقد برضه انى هتصرف كده قبل ما اعمل تحقيق واعرف ان كان الكلام مظبوط ولا لا؟”
اقترب منه ياسر ينكز كتفه بكتف رائف قائلًا بعدم تصديق: “راااائف، وانت من امتى بتهتم بالحاجات دى؟ ولا من امتى بتهتم بموظفة شوفتها بتعيط؟ ولا بتولع حتى؟ لااا مبقاش ياسر ان ماكان الموضوع ده فيه ان…”
ابتسم رائف بسخرية وتهكم وهو مازال مغمض العينين ليراه ياسر ليهمس مرة أخرى لنفسه وهو يهز رأسه بتأكيد: “عيب، زاى ما قلت الموضوع فيه إن، وإن كبيرة كمان.”
الفصل 4
فصل كمان اهو يا بنات ويااارب الرواية تكون عجبكم، واحب اعرف رايكم فيها.
دخلت زينة من باب الشركة تبتسم بضعف لحارس الأمن المنتظر أمام الباب بثبات ليبادلها إياها ببشاشة فتسعت ابتسامتها فرحة تلقي عليه بتحية الصباح بصوت سعيد تدلف إلى الداخل بخطوات سريعة تلقي نظرة حول البهو خالي تمامًا من النشاط الصباحي المعتاد لكنها كانت مدركة لهذا فهي تعمدت الحضور مبكرًا حتى تستطيع الحديث مع مها قبل دوام العمل فأمسا لم تتمكن من الحديث معها لرحيلها مبكرًا وانشغال مها فلم يستطيعا الحديث.
