تقدمت في اتجاه مكتب الاستقبال تجد مها واقفة تستعد يوم عمل طويل هاتفة باسمها بخفوت.
رفعت مها رأسها تبتسم لها ببشاشة قائلة: “زينة ايه يا بنتى اللى جابك بدرى كده؟ مستعجلة اووى على الشقى.”
استندت زينة بذراعيها على طاولة الاستقبال تهمس بنفس متقطع من حماسها وتشديد: “كنت عاوزة اقعد معاكى شوية قبل زحمة الشغل.”
أشارت إليها مها حتى تستدير إليها خلف الطاولة تلف إليها تجلس معها فوق كرسيين متقابلين لتسألها مها: “عاملة ايه فى شغلك مع العقربتين؟”
اخفضت زينة رأسها بارتباك لتسألها مها باستهجان: “حصل ايه تانى منهم؟ انا مش عارفة انتى ما بترديش عليهم ليه، ده لو انا كنت جبتهم كده و…”
قاطعت زينة حديثها وهي تراها فعلًا تحاول النهوض لهم لتهتف بها زينة تحاول تهدئتها وإجلاسها مرة أخرى: “اقعدى، رايحة فين؟ مانتى عارفة ان لسه محدش جه، وبعدين مش ده اللى عوزاكى فيه.”
جلست مها مرة أخرى تسألها بفضول: “ايه! هو حصل حاجة تانية غير موضوع العقربتين؟”
هزت زينة رأسها بالإيجاب لتهتف بها مها بلهفة: “طب ما تحكى، مبقاش وقت وهتلاقى المكان اتملى، هااا حصل ايه؟”
ابتلعت زينة لعابها بصعوبة تقص عليها كل ما حدث أمس هي تراقب وجه مها أثناء حديثها والتي أخذت تتعاقب عليه المشاعر كلما قصت مشهدًا بدءًا بالغضب والغيظ انتهاءًا بفم فاغر بشدة وعينين متسعة بذهول لتناديها زينة بعد انتهائها من روايتها ولكن قابلها الصمت الشديد فتناديها مرة أخرى ولكن تلك المرة بقوة وهي تهزها بعنف: “مها! ردى، انتى عملتى كده ليه مهاااااا؟”
هزت مها رأسها عقب ندائها العالي كمن تفيق من غيبوبة تسألها بخفوت مذهول: “تانى كده؟ أصل مسمعتش كويس.”
همت زينة أن تقص عليها ما حدث مرة أخرى لتهتف مها توقفها: “لااا خلاص، انا سمعت، بس برضه حبيت اتاكد.” لتكمل ولكن بفرحة هذه المرة: “انتى عاوزة تفهمينى انك بقيتى سكرتيرة خاصة لرائف بيه؟”
هزت زينة رأسها تنفي تحاول التصحيح لها: “مش بالظبط، انا هكون مساعدة لسكرتيرته اللى اسمها ايه دى.”
هتفت مها بسعادة ناهضة من مكانها تصفق بيدها: “مش مهم، المهم انك اترقيتى وانتى لسه مكملتيش شهر وبقيتى سكرتيرة فى مكتب رئيس وصاحب مجموعات الحديدى.”
زينة وهي تنهض هي الأخرى قائلة بحزن: “اترقيت ايه يامها؟ هنضحك على بعض؟ مانا لسه حكيلك اللى حصل، انا خايفة يرجعوا تانى لكلامهم عليا، والمرة دى…”
قاطعتها مها تسرع بالإمساك بيدها تهتف بها: “مش مهم حصلت ازاى، المهم تثبتى نفسك فيها، وتثبتى للكل انك جاية هنا للشغل وبس، واظن بعد ما رائف بيه ادخل شخصيًا استحالة حد هيجيب سرتك تانى، صدقينى.”
تصاعد الأمل بداخلها تسألها برجاء: “بجد يا مها؟ تفتكرى ده اللى هيحصل؟”
مها بحنان تربت على خدها قائلة: “اكيد، صدقينى يا زينة، انتى انسانة طيبة وتستاهلى كل خير.”
انحنت عليها زينة بامتنان وعينيها ممتلئة بالدموع تهمس: “انا ربنا عوضنى بيكى، انا لو كان ليه اخت مش هتحبنى زيك كده.”
ابتسمت لها مها بحب وهمت بالرد عليها ليقاطعها صوت عالٍ حاد: “الله الله، ما نقلبها نادى للصداقة، وبلاش شغل بقى.”
التفتت إليها زينة للرد عليها ردًا لاذعًا لكن أسرعت مها بالضغط على كفها توقفها بإشارة منها لتسكتها قائلة هي بأدب مزيف: “صباح الخير انسة شاهى، ياترى فى حاجة اقدر اعملهالك زاى مانت شايفة؟ لسه مواعيد العمل الرسمية ما بداتش لسه، بس مش مشكلة انا فاضية دلوقت واقدر…”
التفتت شاهي مغادرة سريعًا تاركة المكان بخطوات سريعة غاضبة دون انتظار إكمال مها حديثها لتضحك مها بخفوت تتابعها بعينيها لثوانٍ قبل أن تلتفت إلى زينة قائلة بلهفة وسرعة: “بسرعة اطلعى وراها، مدام الحيزبونة دى جات يبقى رائف بيه فى السكة، لازم يجى يلاقيكى موجودة.”
هزت زينة رأسها بالموافقة تلتف من حول الطاولة لتغادر ما إن خطت خطوتين حتى توقفت تلتفت إلى مها تلقي لها بقبلة في الهواء ثم تسرع في المغادرة بخطوات سريعة متعثرة حتى وصلت إلى المكتب في وقت قياسي ترى شاهي تجلس فوق مقعدها براحة ناظرة إليها بتعالٍ بينما وقفت هي تتنقل بقلق من قدم إلى أخرى في انتظار تعليمات تلك الحيزبونة لها والتي ما إن همت بالحديث حتى تغيرت تعبيرات وجهها فجأة تعتدل في مقعدها باحترام ثم تنهض سريعًا هاتفة: “صباح الخير رائف بيه.”
التفتت زينة خلفها بارتباك لتراه يقف خلفها تمامًا يرتدي بدلة رمادية غامقة وقميصًا مماثلًا لا يضع ربطة عنق تاركًا زرين من قميصه دون أن يغلقهم تملأ رائحة عطره أرجاء المكان واقفًا بصمت عينيه الحادتين تتابعها بدقة.
لتفق على نفسها وهي تتأمله باهتمام فتسرع بإلقاء تحية الصباح هي الأخرى عليه لكنه لم يجبها متقدمًا إلى داخل المكتب يوجه حديثه إلى شاهي: “صباح الخير يا شاهى، عاوز ملف صفقة المعمورة يكون قدامى، وابعتيلى القهوة بتاعتى فورًا.”
ثم يدخل إلى مكتبه يغلق خلفه بابه بهدوء بينما وقفت زينة تتابع ما حدث بعينين مرتبكة لا تدري كيفية التصرف لتخرجها شاهي من حيرتها تهتف بحدة: “واقفة عندك بتعملى ايه؟ مش سمعتى كلام رائف بيه؟ ثوانى وقهوته تكون جاهزة.”
زينة بحيرة: “مش فاهمة، يعنى المفروض اعمل ايه؟”
شاهي بحدة وتحكم: “عندك البوفيه على ايدك اليمين، اعملى القهوة وهاتيها حالًا.”
زينة باستغراب: “مش المفروض اللى يعملها عامل البوفيه؟”
ضحكت شاهي بسخرية قائلة بتهكم: “عامل بوفيه ايه يا شاطرة؟ كل طلبات رائف بيه بتتعمل هنا ومن هنا ورايح دى هتكون شغلتك فى المكتب.” ثم نهضت تعبث بداخل خزينة ضخمة خلفها تخرج منها أحد الملفات تتجه إلى باب مكتبه وقبل أن تفتحه التفتت إلى زينة الواقفة بتسمر مكانها قائلة بتشفٍّ: “رائف بيه بيحبها سادة بن دوبل، هتلاقى كل حاجة عندك هناك.” وأشارت بيدها إلى غرفة جانبية ثم دلفت إلى المكتب دون أن تترك لزينة فرصة للحديث والتي أخذت تهمهم بعد دخولها: “ماشاء الله، من الارشيف للبوفيه يا قلبى، لا تحزن هى دى الترقية يا زينة يا بت عم حسين.”
