أفاقت من دوامة أفكارها وهي تراه يترك مكانه متجهًا إلى مكتبه جالسًا فوق مقعده براحة يستند إلى ظهره يراقبها باهتمام قبل أن يتحدث قائلًا ببرود ولا مبالاة: “خلاص براحتك يا زينة، اتفضلى على شغلك وانا بقى هعرف بطريقتى.”
وقفت مكانها مترددة لا تعلم كيفية التصرف لتهمس بتردد: “صدقنى يا رائف بيه، مفيش حاجة حصلت، انا كنت بس…”
صمتت ما إن رأته يمسك بسماعة الهاتف وهو مازال ينظر إليها بنظراته الثاقبة يتحدث بحزم إلى الجهة المقابلة: “كل اللى شغال فى قسم الارشيف يكونوا ادامى حالًا.”
أسرعت زينة تهتف برعب فور سماعها لحديثه: “لااااا لااا ارجوك، كفاية اللى بتقال عليا.”
وضعت زينة يديها فوق فمها بصدمة بعد إدراكها ما تفوهت به تهز رأسها تنفي ما قيل في محاولة بائسة منها للإصلاح، لكنه لم يعيرها أدنى اهتمام وهو يضع سماعة الهاتف مرة أخرى بعد إلغاء أمره السابق ينهض مرة أخرى من مقعده متجهًا إليها عينيه لا تفارقها حتى توقف أمامها عدة ثوانٍ تتابع عينيه ردة فعلها المرتعبة وملامحها الشاحبة ليمسك بكفها بين يديه يسير بها في اتجاه أريكة موضوعة في الجانب يجلسها فوقها بينما جلس هو في مقعد مقابل لها ينحني إلى الأمام يستند بمرفقيه فوق ركبته سائلًا لها بهدوء: “كلام ايه يا زينة اللى بتقال عنك؟ ومين اللى بيقوله؟ ولاخر مرة هسالك، بعدها متلوميش غير نفسك لما اجيب القسم كله هنا ويتعمل تحقيق رسمى فى الموضوع.”
رفعت إليها وجهها ببطء تنظر إليه برعب بعد أن كانت تجلس منحية الرأس تستمع إلى حديثه حتى لاحظت نبرة التحذير والتهديد في جملته الأخيرة تهمس بتلعثم ورعب: “ارجوك حضرتك، انا هقولك كل حاجة، بس بلاش موضوع التحقيق ده.”
تراجع رائف إلى الخلف في مقعده قائلًا بحزم هادئ: “موافق يا زينة، اتكلمى.”
بداخل فيلا فريد شكري
جلس كعادته كل صباح أمام مائدة الطعام يطالع إحدى الجرائد باهتمام إلا أنه اليوم أخذ من بين الحين والآخر ينظر من خلف تلك الجريدة باهتمام إلى زوجته الجالسة في الجهة المقابلة له ببرود وعدم اكتراث به تتناول إفطارها بهدوء، يجدها فرصة له اليوم يهدم بها تلك الواجهة دائمة الظهور أمامه يتمنى رؤيته لبرودها هذا متحطمًا أمامه حتى ولو كان الثمن ذكره لذلك البغيض.
اخفض جريدته ينظر باتجاهها قائلًا بهدوء: “عرفتى ان رائف رجع من لندن من كام يوم؟”
اهتزت ملامح سهيلة بالمشاعر لعدة لحظات تصدعت خلفها واجهة برودها لكنها أسرعت فورًا برفعها مرة أخرى فوق وجهها قائلة ببطء: “وانا هعرف منين؟ ولا يهمنى فى ايه خبر زاى ده.”
أدرك فريد محاولتها الفاشلة لمحاولة رسم لا مبالاتها تلك ولكن قضت عليها ارتعاشة يدها الممسكة بكوب العصير تريق بضع قطرات منه فوق فمها فتسرع بإمساك فوطة المائدة تمسح بها تلك الفوضى وتزيل معها الباقي من تلك المشاعر، ولكن حين تابع فريد بلهجة لم يستطع فيها إخفاء تشفيه فيها قائلًا: “طيب متعرفيش برضه انه سليمان الحديدى تكتبله كل ثروته قبل ما يموت؟”
هذه المرة لم تستطيع سهيلة الاستمرار في رسم البرود تتسع عينيها بصدمة وذهول ينسحب سريعًا كل الدماء من وجهها لتتركه شاحبًا، ولشدة فترتفع ضحكة فريد عالية تدوي في أنحاء الغرفة بتشفٍّ وسرور حين رأى حالتها هذه يهتف بعدها بانتصار: “كنت متأكد ان ده الخبر الوحيد اللى هيأثر فيكى، طبعًا ماهو صعب برضه بعد كل السنين دى تكتشفى ان كل حاجة ضحيتى بيها كانت فى هوا.”
نهض من مقعده متجهًا إليها يقف خلفها هامسًا في أذنيها بفحيح وتشفٍّ: “وانك لما اتخليتى عنه فى عز ماكان محتاجلك كان اكبر غلطة عملتيها، وهو لفت السنين وقدر يثبت لينا كلنا انه عمره ما يكون خسران ابدًا.”
التفت سهيلة بوجهها إليه لا تفصل بينهم أي مسافة تهمس بفحيح وغل هي الأخرى أنفاسها تضربه فوق وجه بقوة كالصفعة تمامًا قاسية بقسوة كلماتها له: “ان كنت انا اتخليت عنه فانا يدوب كنت حبيبة معرفهاش غير كام سنة، مش صاحب عمره وطفولته واللى كان معتبره اخ ليا، بس ياخسارة اول ما ترماله حتة عضمة رمى كل حاجة تحت رجليه وجرى عليها زاى…”
ما إن أنهت حديثها صرخت بألم من أثر قبضة فريد القابضة فوق شعرها بعنف يجرها منه يلقي بها أرضًا هو يصرخ بجنون: “ده اللى جريتى اوام واتجوزتيه بعد ما حبيب القلب فلس والسجن كان بيناديه، ولا نسيتى يا سهيلة هانم؟”
أحنت رأسها بندم لا تقوى على نفي كلماته وقد كانت حقيقة مرة لا يمكنها إنكارها ليسألها فريد بسخرية: “ايه، ندمانة وبتفكرى وتقولى لنفسك لو كنت اعرف ان دى هتبقى النهاية يا رتنى كنت استنيته بدل اللى عملته فى نفسى ده؟ بس احب اقولك مفيش حاجة اتغيرت، وزاى ما رفضك قبل كده هيرفضك تانى وتالت، واستحالة يفكر فيكى ولو ثانية.”
رفعت سهيلة وجهها إليه بصدمة ليكمل فريد بسخرية مريرة: “ايه، كنتى فاكرة انى مش هعرف انك روحتى ليه بعد ما قدر يقف على رجله تانى وعرضتى عليه ترجعوا لبعض؟ وده طبعًا بعد ما تتخلصى من فريد الوحش والخاين، مش كده يا سهيلة هانم؟”
تراجع فريد يجلس فوق المقعد بتعثر يهمس بحقد: “بس هو رفض يتصرف بندالة حتى مع اللى خانه وباعه، ومرضاش ياخد حاجة مش ليه، وادانى قلم عمرى مااتخيلت انه هيكون بالوجع ده.”
صرخت سهيلة بغضب وغل: “عارف ليه؟ علشان هو احسن منك، عنيه شبعانة مش محتاج يخون علشان يوصل للعوزه.”
نهض فريد من مقعده يشدها مرة أخرى من خصلاتها يصرخ بغضب: “وانتى بقى اللى عوزه، طيب قاعدة معايا ليه لحد دلوقت لما انتى واثقة منه اووى كده؟”
صممت سهيلة تغمض عينيها بألم ليكمل هو بحقد: “اقولك انا ليه، علشان انتى مش واثقة منه، مش ضامنة لو سبتينى هيرجعلك ولا لا، مش قادرة تتطلقى منى علشان متقدريش تستغنى عن كل اللى معيشك فيه من غير ما يكون فى ايدك صيدك اكبر واهم، واثقة منه، مش كده يا هانم يا بنت الاكابر؟”
ترك رأسها دافعًا لها بعنف لتصرخ بألم من قسوته وعنفه معها بينما وقف هو يراقبها بعينين تغشيها كل مشاعر الحقد والغل والغضب بداخله دقائق طوال ثم يتحرك مغادرًا الغرفة بخطوات سريعة غاضبة بينما ظلت هي منحنية الرأس تتساقط دموعها والتي ابت أن تترك لها العنان أمامه تغرق وجهها وهي تقسم بداخلها أن ترد له الصاع صاعين بأن يكون رائف الحديدى في يوم ما لها وليس لواحدة أخرى غيرها.
ظل رائف طوال حديثها يستمع بصمت بوجه خالي من التعبير حتى انتهت تمامًا وفي عينيها نظرة رجاء تهمس: “صدقنى يا رائف بيه، انا مش كده، انا لحد دلوقت مش عارفة ازاى قدروا يفكروا فيا بشكل ده.”
