أماني ماشية في شغلها وحالها وحياتها تمام بنجاح وتفوق وتطور دائم …..
أمل بنت خالها في شغلها وحالها وإتصالحت هي وخطيبها حسن وعادي زي ماهما يوم كويسين يوم زعلانين ومختلفين علي أتفه الأسباب وطبعاً أمل هي اللي بتتخانق معاه بسبب وجود مامته معاه واهو متحمل وساكت علشان يتجوز ويستقر وبيقول في نفسه هو ومامته اللي نعرفه أحسن من اللي مانعرفوش ….
منال في شغلها ماشية تمام وكويسة ومستنية نصيبها وسايبة كل شئ علي ربنا ولابيشغلها الخطوبات ولا الجواز في أي شئ ….
الأستاذ فاروق مازال بيزيد إعجابه وحبه لأماني كل يوم أكتر من اليوم اللي قبله ودائما مراقبها في كل تحركاتها وعينه مش بتتشال من عليها أبدأ وطبعاً هي ولافي دماغها ولا واخدة بالها أصلا منه كل اللي شاغلها شغلها لكن صحابها اللي معاها في المكان اخدوا بالهم ودائما بيتكلموا ويتريقوا عاللي بيحصل بس من العادة الكلام بيأجي عند صحابه ويقف ….
وبعد مرور أسبوع من أحداث قصتنا وأبطالها :
كانت أماني في مكتبها وفي أخر اليوم وكانوا كلهم خلصوا شغلهم وبيجهزوا حالهم وبينهوا شغلهم ومروحين بعد إنتهاء اليوم المتعب الشاق من ضغط شغل وعمل ……
أماني كانت بتخلص شغلها وتقفل كل شئ والكمبيوتر بتاعها وقايمة من علي مكتبها علشان تأخد شنطتها وتمشي وكانوا زملائها في المكتب مشيوا قبلها اللي دخلوا يغيروا ويجهزوا حالهم واللي نزلوا يعني هي كانت إتاخرت خمس دقائق علي ماكملت شغل اليوم وقفلته ونهته بالكامل وفجأة إتفاجئت بالأستاذ فاروق جاي عليها وبيتكلم معاها ….
_الأستاذ فاروق :أهلا ازيك ياأماني ايه اتأخرتي كده ليه زملائك كلهم خلصوا وروحوا ….
_أماني :متأسفة والله يا أستاذ فاروق بس كان فاضل شوية حاجات قولت لازم انهيها حاجات بسيطة يعني مش مستاهلة اسيبها وبعدين ده أنا إتاخرت خمس دقائق مش كتير والناس لسه نازلين ماشين بعد إذن حضرتك بقي…..
_الأستاذ فاروق :طب استني تعالي أوصلك بعربيتي لحد بيتك كمان ….
_أماني :متشكرة حضرتك أنا هروح أنا ….
_الأستاذ فاروق :أصل عاوز اتكلم معاكي ياأماني في موضوع مهم أوي وضروري بالنسبالي …
_أماني بخضة وخوف وقلق :خير يا أستاذ فاروق موضوع مهم بخصوص ايه مافيش بيني وبين حضرتك مواضيع بره الشغل هو أنا قصرت في شغلي ولاحاجة وحضرتك زعلان أو مدايق مني ….
_الأستاذ فاروق :لا خالص أنتي من أحسن وأفضل الموظفين في الشركة عندي وأنا بشوف شغلكم واحد واحد وواخد بالي من كل موظف فيكم بيكون شغال إزاي …
_أماني :اومال فيه ايه حضرتك قلقتني ….
_الأستاذ فاروق :لا ماتقلقيش موضوع هيفرحك جدا وفجأة بكل جرأة منه قال :
“بصراحة ياأماني أنا معجب بيكي بقالي فترة كبيرة ومش عارف كل يوم عن اليوم اللي قبله بتعملي فيا ايه أنا بحبك ياأماني ونفسي اتجوزك نفسي تكوني مراتي أنا مش قادر استني ولااصبر ولااستحمل أكتر من كده أنا خلاص بقيت مدمن بيكي وبحبك تتجوزيني ياأماني موافقة تكوني زوجة الأستاذ فاروق موافقة تكوني ليا وملكي وفي بيتي ”
_أماني بذهول من اللي بتسمعه ومش مصدقاه ردت وقالت :
“أستاذ فاروق ايه الكلام اللي حضرتك بتقوله ده أنتا بتهزر ولاايه أنتا راجل متجوز ومعاك مراتك وولادك إزاي عاوز تتجوزني طب مش قلقان من رد فعلها أما تعرف أو مش خايف علي زعلها وزعل ولادك منك لما تجيب ليهم مرات أب علي أمهم ”
_الأستاذ فاروق : لا عادي وايه يعني الجواز حلال هو أنا هعمل شئ حرام يغضب ربنا أنا ماليش غير في الحلال اللي يرضي ربنا وأنا شفتك وأعجبت بيكي وحبيتك وبطلبك للجواز مالكيش دعوة بمراتي بقي أنا حر والراجل ليه يتجوز أربعة زي الشرع ماقال ”
_أماني : حضرتك فاهم الشرع غلط يا أستاذ فاروق الشرع قال أربعة بشروط ولو لظروف وأحوال معينة :
مثلا لو متوفية أو عقيمة مش بتخلف أو مريضة لاقدر الله مرض صعب وماتقدرش علي تأدية طلبات زوجها وأولادها وبعدين غالبا مش بيكون سبب إن الراجل يتجوز عليها ده المفروض يقف جنبها في تعبها ومرضها مش يرميها ويتجوز غيرها……
مثلا لو مقصرة معاه وفي حقه وبرضه يتجوز بعد عدة محاولات إن هي تتغير ويكون مديها فرص كتير مش يتجوز علي طول ومايصدق …..
مثلا لو منفصلين عن بعضهم ومافيش أمل لرجوعهم تاني …..
مثلا لو ست لاقدر سيئة السمعة أو مش محترمة وهو عاوز يتجوز ست تصونه وتصون بيته وحاله …..
الجواز ليه أسبابه يا أستاذ فاروق واحنا نسمع إن مراتك ست محترمة وكويسة جدا ليه عاوز تتجوزني عليها واشمعنا أنا من بين كل ستات الدنيا أكيد فيه ستات وبنات أحسن وأغني وأعلي مني وتناسبك عني بس بلاش أنا أرجوك ابعدني حضرتك عن الحكاية دي …
_الأستاذ فاروق : لا مافيش حد غيرك يملي عيني وقلبي وحياتي ياأماني أنا بحبك أنتي وعاوزك أنتي وهعيشك في فيلا لوحدك بعيد عن مراتي وولادي وأنتي مالكيش دعوة بيها ولاهي ليها دعوة بيكي كل واحدة منكم في حالها وليها حياتها …..
_أماني :أسفة يا أستاذ فاروق أنا ماأقبلش علي نفسي أكون زوجة تانية وماأقبلش اخد راجل من علي مراته وولاده ماأقبلش اخد لقب خطافة الرجالة بعد لقب المطلقة اللي اخدته بدري بدري وأنا كنت لسه 25سنة وإحتمال اخدوا للمرة الثانية كمان لأن مهما كان فيه مثل قديم عندنا بيقول :
“القديمة تحلي ولو كانت وحلة ”
والرجل في الأخر لمراته أول بخته وحياته واللي طول العمر معاه وواقفة في ضهره وربتله ولاده وكافحت معاه طول عمرهم وبعدين مش عاوزة اعمل شئ ارجع بعد كده اندم عليه لما ربنا يرده ليا لانك زي ماهتتجوزني عليها هتتجوز عليا أنا كمان وحبك ليا وإعجابك بيا ده مجرد وقت وهيروح لحاله بتكون السكينة سارقة البني أدم بس وقتها لكن بعد كده بيرجع لعقله وصوابه وفي النهاية الزوجة الثانية بتكون هي الخسرانة …….
_الأستاذ فاروق :لا ماتقلقيش أنتي وبس اللي في القلب ياأماني بحبك أنتي وهعيش وأحبك جدًا …
_أماني :ماتقولش الكلام ده ربنا يخليك لبيتك ومراتك وولادك سامحني يا أستاذ فاروق مش هقدر وإن شاءالله الحب ده هتقدر تتغلب عليه وتنساه بعد إذن حضرتك أنا اتأخرت والوقت سرقنا أوي …
