التفت رائف إليه تلتمع عينيه بغل وكراهية تخرج كلماته من بين شفتيه كالفحيح: “عاوزنى اسامحه بعد كل اللى عمله وبيعمله معايا حتى بعد موته؟ عاوزنى انسى ذلى وذل امى وموتها بسبب قهره وذله ليها؟ لا، وكفهوش كل ده، لسه عاوز يلعب معايا ويتحكم فيا حتى بعد موته، بس مابقاش رائف الحديدى اما عرفت كل واحد مقامه فين.”
أحنى ياسر رأسه يستمع إلى كلمات صديقه والتي تقطر من كل حرف فيها بكل ما عاناه طول سنين حياته من مأسى كان هو شاهدًا عليها ليهمس له بصوت حاول جعله عاديًا لا يحمل أي شيء من الشفقة التي يشعر بها من أجله: “يعنى نويت على اللى فى دماغك برضه؟”
التعمت عين رائف كعين فهد وقعت تحت يده فريسة طال انتظاره لها يغمغم بوحشية: “طبعًا، مش ده اللى كان عاوزه، وانا هعمله اللى كان نفسه فيه، بس على طريقة انا، وابقى عبيط لو مستغلتش اللى حصل صح اوووى.”
الفصل 2
مر على زينة أسبوع في عملها لدى شركة الحديدي استمتعت وأحبت عملها كثيرًا فقد أتاح لها العمل هنا التعرف على أشخاص وزملاء لها كانوا جميعًا لطفاء معها يسود جو من الود والاحترام بينهم، لكن تظل دائمًا اللحظة المفضلة لديها في يومها كله هو لحظة مراقبتها له في حضوره وانصرافه، تظل تتابعه بشغف وإعجاب كما لو كانت ترى إحدى نجوم السينما يمر من أمامها كل يوم ليبعث في قلبها الرهبة، لحظة التقاء عينيهم في كل مرة تشعر بتعمده إطالة النظر إليها لعدة ثوانٍ تشعر خلالها برفرفة واضطراب دقات قلبها فتصبح على هذه الحالة طوال اليوم تتكرر مجددًا لحظة رؤيتها له مغادرًا.
لحظات كانت تتركها بعدها كما لو كانت خفيفة دون وزن فتصبح تلك اللحظات من أثمن أوقاتها في يومها كله.
استمر يومها كالمعتاد حتى قبل موعد انصرافها بساعة لتهمس لها مها بخفوت: “زينة انا مش قادرة اكمل، فلو استاذنت وروحت بدرى هتقدرى انتى تكملى لوحدك؟”
هزت زينة رأسها بالإيجاب قائلة بثقة: “طبعًا روحي انتى ومتقلقيش، أساسًا مبقاش غير ساعة على الانصراف.”
زفرت مها قائلة: “ماهو القلق كله من الساعة دى، انتى ناسية ده ميعاد خروج رائف بيه ولازم يخرج هو الاول وبعدين نمشى احنا، وخايفة يلاحظ غيابى.”
ربتت زينة على يدها تحاول طمئنتها: “متقلقيش كده، دى ثوانى وبيعدى على طول، يعنى مش معقولة هيلاحظ حاجة فيهم.”
نظرت إليها مها بقلق: “انتى شايفة كده؟”
هزت زينة رأسها بالإيجاب وهي تنهض من كرسيها: “ايوه، ويلا بقى انتى علشان شكلك تعبانة اوووى.”
وقفت مها لتغادر مودعة زينة التي وقفت تستعد لاستكمال عملها ليمر بها الوقت سريعًا لا تنتبه له حتى وقف أحد العاملين معها في الشركة، شاب يعمل في قسم المحاسبة تعينا معًا في نفس اليوم ومنذ أن علم بهذا أخذها فرصة للحديث معها بدعوى أنهم حديثو التعيين وليس لهم أصدقاء هنا، ولكنها أصبحت تشعر معه بالحذر فقد أصبح يتمادى في حديثه معها بطريقة فظة مبالغ فيها تشعرها بعدم الارتياح، وهاهو الآن يقف يستند براحة فوق الطاولة أمامها يضحك بسماجة على إحدى النكات التي قام بإلقائها منذ قليل لتخفض رأسها في محاولة منها لمداراة ضيقها منه حتى دوى صوت جهوري هز أرجاء المكان يهتف: “انت ايه اللى موقفك عندك كده؟”
اتسعت عينيها بصدمة عند معرفتها هوية المتحدث لترفع رأسها تنظر إليه برعب تحاول ابتلاع لعابها أكثر من مرة لتفشل وهي تراه يتقدم من مكانهم حتى وقف أمام الموظف البائس تشع عينيه بغضب عنيف قائلًا بجمود: “انت مين وواقف عندك ليه؟”
أخذ الموظف البائس وقد احمر وجهه بشدة حتى خشيت زينة إصابته بأزمة قلبية يتلعثم في كلماته يخرجها بصعوبة من فمه: “انا أصل كنت…”
هدر صوت رائف بعنف قائلًا: “انا سألت سؤال ولسه لحد دلوقت ماتجوبش عليه، وانا مبحبش اكرر كلامى تانى.”
فأسرع الموظف يجيبه باسمه ومكان عمله بتلعثم وخوف ليهز رائف رأسه قائلًا ببطء: “يعنى مش موظف فى الاستقبال ولا ليك شغل هنا.” ليصرخ عاليًا بينما وقف جميع الحضور يراقبون ما يحدث بصمت: “يبقى مخصوم منك عشر ايام علشان اللى حصل ده ميتكررش منك او من اى حد يفكر يعملها، مفهوم؟”
هدر بالكلمة الأخيرة بصوت عالٍ جعل كل المتابعين للموقف ينتفضون بفزع حتى زينة الواقفة تتابع ما يحدث برعب وهي تراه يصرف الموظف المرتعب من أمامه بحركة مترفعة من يده ليفر من أمامه بخطوات سريعة متعثرة، ثم نظر رائف إلى الجمع المراقب يهتف بحزم: “كل واحد على شغله، مش عاوز حد واقف هنا.”
تبعثر الجمع يمينًا ويسارًا سريعًا يراقبهم هو بلا مبالاة ثم التفت إلى زينة بعينيها المتسعة بانبهار وإعجاب فتتسع عينيه هو الآخر، ولكن دهشة من رؤيته لتلك النظرة دائمًا الظهور بعينيها ذات اللون السماوى الصافي كلما تقابلت أعينهم، فأخذ يطيل هو النظر فيهم ناسيًا تمامًا ما أراد تعنيفها عليه حتى انتبه على نفسه وهو ينظر إليها بتلك الطريقة ليتنحنح محاولًا إجلاء صوته يهتف بها بحزم: “وانتى اللى حصل ده ماتكررش تانى، ده مكتب استقبال للعملاء مش مسرح يتقال عليه نكت، فاهمة؟”
هزت زينة رأسها وهي مازالت على حالتها المنبهرة بحضوره ليهز رأسه باستسلام من تلك الحمقاء أمامه مغادرًا بخطوات سريعة واثقة تتابعه هي بعينيها بإعجاب حتى اختفى عن أنظارها لتتنهد تبتسم برقة كما لو كانت لم تتعرض لتعنيف منذ قليل.
بداخل أحد أشهر مكاتب المحاماة جلست سوزان الشريف تهز ساقيها بعصبية وفي يدها إحدى سجائرها ذات اللون الوردي تنفس دخانها بعنف لينهض مجدي التهامي المحامي الخاص بها من خلف مكتبه متجهًا للجلوس في المقعد المقابل لها يهتف برقة: “اهدى كده يا سوزان، مفيش داعى ابدًا لعصبيتك دى.”
أسرعت سوزان بإطفاء سجارتها داخل المنفضة أمامها وهي تصرخ بعنف: “انت بتقول ايه يا مجدى؟ عاوزنى بعد عمرى اللى ضيعته مع واحد اد ابويا وبعد كل اللى عملته اطلع كده من كل الحكاية بشوية ملاليم وتقولى اهدى؟ دا ممكن يحصلى حاجة لو ده حصل.”
راقبها مجدي وهي تخرج سجارة أخرى تشعلها بيد مرتعشة ليحدثها بهدوء محاولًا تهدئتها: “مين قالك اننا هنسمح بالكلام ده؟ كلام الوصية واضح، لو منفذش خلال شهرين كل حاجة هتبقى بتاعتك، وانا وانتى عارفين رائف كويس، مش هيعملها عند فى ابوه ولو حتى علشان ميراثه منه اللى كلنا عارفين انه مش محتاجه.”
نهضت سوزان تلتف حول كرسيها تقف خلفه هاتفة بغضب: “احنا هنضحك على بعض يا مجدى؟ انت عارف كويس انه هينفذ الوصية حتى ولو على رقبته، المهم عنده انه ميخلنيش اطول قرش من فلوس ابوه.” لتكمل بهمس بضعف: “انت ناسى انا عملت ايه فى امه وازاى كنت سبب فى موتها؟”
نهض مجدي هو الآخر قائلًا بجدية: “يبقى مهمتنا اننا نمنع ده ونقف ادام اى محاولة منه لتنفذها.”
ضحكت سوزان بتوتر تهتف: “وده هنعمله ازاى؟ هنمشى وراه نراقبه؟”
مجدى بتفكير ينظر إلى البعيد بشرود: “دى بقى نفكر فيها كويس، واكيد مش هنغلب، نلاقى ليها حل.”
شركة الحديدي صباحًا
“يا نهار مش فايت، وحصل ايه بعد كده؟” هتفت مها بكلماتها تلك بصدمة ورعب بعد أن قصت عليها زينة كل ما حدث بالأمس لتهتف زينة بسعادة: “ابدا، خصم لسعد عشرة ايام وزعقلى وزغلى بعنيه الحلوين دول وسبنى ومشى.”
اتسعت عين مها بذهول وهي ترى تلك السعادة المرتسمة فوق وجهها تسألها بدهشة: “بس كده! يعنى مخصمش منك انتى كمان حاجة؟”
هزت زينة رأسها بالنفي لتستأنف مها حديثها بهمس كما لو كانت تحدث نفسها: “غريبة اووى دى، ده قليل لو مكنش رفدك فيها.”
صمتت لتنتبه لنظرات زينة تتجه ناحية باب الشركة تلتمع بسعادة فتلتفت هي الأخرى ناحيته ترى رائف الحديدي يدلف إلى الداخل غير مبالٍ بخطواته الواثقة السريعة حتى توقفت خطواته فجأة أمام مكتب الاستقبال ولصدمتها اتجه بخطواته ناحيتهم يصوب نظراته فوق زينة الواقفة بتخشب تتسع عينيها بانبهار كما هي عادتها كلما رأته ليحدثها بحزم مشيرًا إليها: “انتى عشر دقايق وتكونى فوق فى مكتبى.”
