فتحت زينة الباب تدلف إلى الداخل تتبعها سعاد تكمل حديثها: “أصل المنيل صاحب البيت جالك تاني هنا وانتِ بره، وراسه والف سيف ياخد الإيجار مرة واحدة، بس انا قدرت اسكته بكلمتين لحد ما تيجي ونشوف هنعمل ايه.”
ارتسم القلق فوق ملامح زينة قائلة بخوف: “بس انا مش هقدر ادفع المبلغ كله مرة واحدة حتى ولو قبضت مرتب الشهر ده.”
أسرعت سعاد تطمئنها قائلة: “لا متقلقيش، احنا بس نسكته بحاجة من تحت الحساب وبعد كده نبقى نديله كل شهر مبلغ، المهم ان ربنا كرمك بالشغلانة دي.” ثم سألتها بنبرة آسفة: “برضه مفيش حد من اهلك سال ولا جه؟”
سقطت زينة جالسة فوق الأريكة بإرهاق تهز رأسها بالنفي هامسة: “ابدًا، مع اني نزلت نعي في الجورنال من اسبوع بس مفيش أي حد سال.”
سعاد في محاولة لتهوين عليها: “معلش اهو الحمد لله ان ربنا كرمك بالشغلانة دي، وعلى الأقل هتفضلي في شقتك ومعانا.”
اخفضت زينة رأسها بأسى وانكسار قائلة: “انا مكنتش عارفة ان الأمور كانت معقدة مع بابا كده لدرجة انه ميدفعش الايجار كل المدة دي.”
نظرت إليها سعاد قائلة بشفقة: “الله يرحمهم، ظروف تعب ابوكي مع مصاريف دراستك أزمت الدنيا معاهم، وهما حاولوا على اد ما يقدروا يخبوا عنك لحد ما تاخدي شهادتك، بس يا حسرة عليهم ملحقوش يفرحوا بيكي، ومجاش في بالهم انهم هسيبوا كل الديون دي ليكي.”
اقتربت منها تضع يدها فوق كتفيها تضغط برفق قائلة بمرارة: “انا كان نفسي اساعد بس غصب عني، انتي عارفة الظروف.”
نهضت زينة تحتضنها قائلة بامتنان: “كفاية عليا وقفتك معايا من ساعة وفاة بابا وماما، وانتي ماسبتنيش دقيقة واحدة، يارب بس يقدرني على رد جميلك ده.”
ابتعدت عنها سعاد تنكزها في كتفها برقة قائلة: “جميل ايه يا بت انتي، دانتي زاي بنتي بالظبط، وامك كانت اكتر من اخت ليا.” ثم ابتسمت بحنان تمسك بيدها تكمل قائلة: “يلا تعالى نتغدى سوا ونشوف هنعمل ايه مع صاحب البيت وهنقوله ايه لحد ما تقبضي مرتبك.”
ابتسمت لها زينة بحب تشكر الله على وجود هذه السيدة في حياتها لتهون عليها مرارة كل ما حدث لها.
وقفت زينة خلف مكتب الاستقبال الخاصة بالفرع الرئيسي لمجموعة شركات الحديدي تلاحظ على غير العادة حالة من التوتر والنشاط المفرط لم ترها منذ عملها هنا منذ أكثر من أسبوع لتميل هامسة إلى زميلتها مها تسألها: “مها هو في حاجة النهاردة؟ أصل شايفة الكل متوتر والحال على غير العادة.”
ردت مها بنفس الهمس: “لا متقلقيش، بس رائف بيه أخيرًا وصل من السفر، أصله كان مسافر انجلترا يجي اكتر من شهر، وطبعًا لما الكل عرف بخبر وصوله بقى حالهم زاي مانتي شايفة كده.”
نظرت إليها زينة بتوجس قائلة: “يعني خبر وصوله يعمل فيهم كل ده؟ ده من وقت وصولهم والكل عامل زاي خلية النحل.”
هزت مها رأسها قائلة بتفهم: “اه مانتي جديدة ومتعرفيش مين هو رائف الحديدي.” لتقترب منها قائلة بجدية وانبهار شديد: “شوفي يا بنتى، رائف بيه ده لو شاف نسمة هوا معدية لازم يعرف رايحة فين ولمين وليه، كل حاجة هنا بأمره هو وبس، شخصية كده مينفعش يتحكى عنها، ده لازم تشوفيه بعنيكى علشان تعرفى بتكلم عن ايه.”
كانت زينة طول حديثها تتسع عينيها بذهول ورهبة من حديثها عن هذا الرائف تتمنى ألا تلتقي به أبدًا شخصيًا وتظل في مكانها المنسي هذا بعيدًا عن الأنظار.
مر بهم الوقت سريعًا حتى ساد الصمت فجأة أرجاء المكان ترى الجميع تتوجه أنظارهم ناحية باب الشركة باهتمام لتركز أنظارها هي الأخرى عليه حتى ترى ما الذي جذب انتباه الجميع ليدخل إلى الشركة في تلك اللحظة شخصًا تحيط به هالة من القوة والعظمة تبعث الرهبة في النفوس، معه العديد من الأشخاص يبدون كمساعدين له، فأخذت تراقبه بأنظارها لا تستطيع ابعادها عنه، فهو مثال رائع لأحد أبطال الروايات التي تعشق قراءتها فتراه متجسدًا أمامها في الواقع بهيئته وخطواته الواثقة المتمهلة، يرتدي بدلة من اللون الأسود وقميص من نفس اللون مفتوح الأزرار ليزيد من غموضه أكثر، فأدركت هويته فورًا قبل أن تميل عليها مها تهمس بإعجاب وعينيها هي الأخرى تتابعه: “مش قلتلك لازم تشوفيه علشان تعرفى انا بتكلم عن ايه.”
هزت زينة رأسها بضعف توافقها دون النطق بكلمة تراقبه وقد أحاط به العديد من مسئولي الشركة يتحدثون إليه باهتمام وتملق وهو ينصت إلى حديثهم بعدم مبالاة ووجه خالي من التعبير، تجول عينيه في المكان بحدة وتجهم حتى توقفت عند مكان وقوفها خلف الطاولة المخصصة لاستقبال العملاء لتضيق نظراته فوقها ينظر إليها بحدة، تتقابل نظراتهم لبضع ثوانٍ شعرت خلالها بضربات قلبها تتصاعد بقوة تتنفس بعنف وخشونة تقع تحت تأثير عينيه الحادة حتى فقدت اتصال نظراتهم فجأة مشيحًا بعينيه بعيدًا مبتعدًا عن المكان ليستقل المصعد المخصص له غائبًا عن الأنظار ليتنفس الجميع الصعداء ويعود الارتياح والهدوء إلى المكان مرة أخرى.
إلا هي فقد أحست بقدميها لا تقوى على حملها فتسرع بالجلوس فوق المقعد خلفها لتضحك مها ما إن رأتها على تلك الحالة قائلة بمرح: “ده كان نفس رد فعلى أول مرة شوفته، بس بعد كده اتعودت.”
رفعت زينة عينيها إليها تهمس بصدمة: “وانا بقى هفضل على الحال ده كل مرة هشوفه فيها لحد ما اتعود؟”
ضحكت مها بقوة من كلماتها العفوية تربت فوق كتفها قائلة: “خلى عندك امل وادعى تتعودى بسرعة.”
زينة: “ولا متعودش، الحمد لله ان شغلى بعيد عنه، خلينى فى الامان اضمن.”
دخل رائف إلى مكتبه تتبعه سكرتيرته الخاصة شاهي تتهادى خلفه في تنورة قصيرة رمادية اللون وقميص أبيض يضيق فوق صدرها تهتف بسعادة وغبطة: “حمدلله على السلامة رائف بيه، متعرفش اد ايه انت كنت وحشنى.” لتصمت تحاول إصلاح كلماتها بخجل مفتعل: “اقصد وحشتنا كلنا يعنى.”
جلس رائف خلف مكتبه يريح ظهره فوق مقعده ينظر إليها يقيمها من أعلاها إلى أسفلها ثم العكس، يدرك محاولاتها الدائمة للفت انتباهه لها فهي منذ عملها لديه منذ أكثر من عام وهي لا تمل من تلك المحاولات والتي أصبحت تشعره بالتسلية أكثر من شعوره بالغضب، يراها لا تستسلم أبدًا.
نظر إليها مستمعًا قائلًا بكسل: “اخبار الشغل ايه فى غيابى يا شاهى؟”
هتفت شاهي بلهفة شديدة تشير إلى عدة أوراق فوق مكتبه: “كله تمام حضرتك، وانا عملت تقرير بكل اللى كان بيحصل فى الشركة طول فترة غيابك ادام حضرتك على المكتب.”
لم يرفع رائف عينيه عنها، لا ينكر إعجابه بتفانيها في عملها فهي تدير كل أمور مكتبه بسلاسة وإخلاص وهذا ما يجعله يتغاضى عن محاولاتها المراهقة هذه للفت انتباهه لها.
أمسك بقلمه يديره بين أصابعه وهو مازال ينظر إليها: “وياسر عمل ايه فى اللى قلت عليه قبل ما اسافر؟”
أسرعت بالسير إليه تلتفت حول المكتب لتقف بجواره تميل عليه بحركة مقصودة ترفع وجهها إليه قائلة برقة: “كله موجود عند حضرتك فى التقرير.”
تقابلت نظراتهم لترفرف برموشها ببطء وإغراء في محاولة منها لكسر تلك البرودة التي تراها دائمًا في عينيه، ولكن لا فائدة تذكر وهي تراه يرجع إلى الخلف في مقعده قائلًا ببرود ولا مبالاة: “تمام يا شاهى، تقدرى ترجعى مكتبك وانا هشوف التقرير بعدين.”
بهتت ملامحها تعتدل في وقفتها قائلة بإحباط: “تمام يا رائف بيه، تحب ابلغ ياسر بيه انك موجود فى مكتبك؟”
أخذ رائف يدير قلمه بين أصابعه ببطء ينظر إليه بتركيز: “اه، ومدخليش حد عليا لحد ما اديكى اوامر تانية.”
هزت شاهي رأسها بالموافقة تتحرك مغادرة الحجرة ليستوقفها رائف مناديًا لها بحدة لتتوقف مكانها تنظر إليه باهتمام وأمل ليسألها وهو مازال ينظر إلى قلمه بين أصابعه قائلًا باقتضاب: “فى موظفين جداد اتعينوا وانا مسافر؟”
عقدت حاجبيها تستغرب من ذلك السؤال فهذه هي المرة الأولى التي يسألها عن هذا الأمر لتجيبه بحيرة: “مش عارفة يا رائف بيه، الامور دى من تخصص قسم ال…”
رفع رائف عينيه إليها بحدة لتتنحنح قائلة بسرعة: “ثوانى وهيكون عند حضرتك ملف بكل اللى اتعينوا جديد.”
هز رأسه يشير إليها بالانصراف لتغادر سريعًا لتنفيذ هذا الأمر الغريب لها تاركة إياه يرجع إلى الخلف يستند برأسه إلى مقعده يتذكر تلك العيون كالبحر الهادئ بنظراتهم المتسعة بانبهار وبراءة.
حتى سمع دقات هادئة على باب مكتبه ليدلف بعدها ياسر إلى الداخل قائلًا بمرح: “ايه النشاط ده كله؟ من الطيارة للشركة على طول، ايه يابنى انت ما بترحمش نفسك.”
نظر إليه رائف بتسلية: “انا قلت اجى اطمن، هببت ايه فى غيابى قبل ما اعمل حاجة تانية.”
تقدم ياسر إلى الداخل يجلس في الكرسي المقابل للمكتب قائلًا بجدية: “لا اطمن، كل اوامرك اتنفذت بالحرف.”
اعتدل رائف في جلسته يعقد حاجبيه باهتمام وحزم: “تمام كده، وعملت ايه مع المحامى؟”
هز ياسر رأسه بتأكيد قائلًا: “اجل كل حاجة لحد رجوعك من السفر، خصوصًا انك سافرت بعد الجنازة على طول، يعنى مكنش يقدر يعمل غير كده.”
كست ملامح رائف مشاعر لا يمكن قراءتها بعد انتهاء ياسر من حديثه ينظر أمامه بشرود حتى تنحنح ياسر قائلًا بخفوت وتردد: “سامحه يا رائف، هو دلوقت بين ايد ربنا، وخصوصًا انه كتب لك كل حاجة رغم انه كان يقدر يعمل العكس بعد كل سنين الخلاف اللى بينكم.”
