أبويا كان رافض يرد عليه تماماً، وأمه وأخته كانوا في البيت هناك بيغلوا لما عرفوا إن الموضوع كبر ووصل لكبار العيلة. طارق مكنش قادر يروح شغله، وساب البيت وقعد عند واحد صاحبه لأنه بقى قرفان يدخل شقة أمه ويبص في وشهم بعد الفضيحة اللي عملوها.
في الأسبوع التاني، طارق جه تحت بيت أبويا.. وقف بالعربية بالساعات، يستنى أبويا ينزل يصلي المغرب عشان يرمي نفسه تحت رجليه.
ولما أبويا نزل من الجامع، طارق جري عليه، وحضنه والدموع مالية عينيه
يا عمي بالله عليك اسمعني.. نورهان مراتي وعرضي، وأنا قسماً بالله ما كنت أعرف غل أهلي يوصل لكده، أنا أخدت حقي وحقها منهم وكسرت البيت عليهم، بس متحرمنيش منها! أنا من غيرها ضايع والله العظيم برحل بالبطيء!
أبويا بص له من فوق لتحت بجمود وقال له بجملة واحدة قطعت نفسه
اللي ميعرفش يصون عرض بيته ويصدق في مراته الغدر من أول وش، ملهوش حريم عندنا يا طارق.. ارجع لأمك خبي في حضنها، وبنتي متلزَمكش.
وسابه ومشي!
مر تلات أسابيع كاملة، وطارق اتغير حاله تماماً.. عرفت من قرايبنا المشتركين إنه خس للنص، وإنه طرد أخته من حساباته ومبقاش يكلمها، وأمه جالها الضغط والسكر من كتر ما هو مقاطعها ومش راضي يقعد معاها دقيقة واحدة، ومبقاش يدخل الشقة الكبيرة غير عشان ينام في شقته فوق لوحده زي الغريب.
في نهاية الأسبوع الرابع، حسيت إن الرسالة وصلت له في الصميم، وإن الدرس حفر في قلبه علامة عمره ما هينساها.. الراجل عرف حجم غلطته، وعرف إن مراته مش حيطة مايلة يقدر يرمي عليها غضب أهله.
ساعتها قولت لأبويا
يا بابا، طارق لو جه المرة دي، قابلوا.. بس القعدة دي مش هتكون صلح عادي، القعدة دي هتكون بداية حياة جديدة بشروطي أنا، وإلا كل واحد يروح لحاله.
أبويا ابتسم وقال
عين العقل يا بنتي.. الكرامة تتبني قبل العمار، والبيت اللي ميتأسسش على العدل يخرب من أول هبة ريح.
تاني يوم، طارق جه معاه عمه الكبير، راجل محترم ومعروف في عيلتهم بالحق والعدل.
قعدوا في صالون بيت أبويا، وأنا كنت قاعدة ورا الباب سامعة كل كلمة.
عم طارق اتكلم بكل أدب واحترام، واعتذر بالنيابة عن العيلة كلها، وقال لأبويا
يا حاج، إحنا جايين معترفين بالذنب، وعارفين إن الست نورهان اتظلمت ظلم بين، وطارق غلطان لما سمع وماتحرّاش، بس الواد بيحبها وشاريهّا، وعايزين نلم الشمل باللي يرضي ربنا ورسوله.
طارق وطى راسه في الأرض وقال بصوت مكسور
يا عمي، اطلب اللي إنت عايزه.. والله لو طلبت رقبتي فدا كرامة نورهان هديهالك، المهم نورهان ترجع لبيتها، وأنا مستعد لأي حاجة تطلبها عشان أثبتلها ندمي.
أبويا بص لطارق وقال له بحزم
أنا مش هطلب حاجة.. صاحبة الشأن هي اللي هتنزل تطلب شروطها، وإن وافقت عليها بالورقة والقلم، كان بها.. موافقتش، يبقى المأذون هو الحل.
دخلت الصالون.. كنت لابسة أحسن ما عندي، راسي مرفوعة، وباصة لطارق بقوة وثبات مكنش متعود يشوفهم فيا زمان لما كنت بستحمل وأعدي.
طارق أول ما شافني عينيه لمعت بلهفة ووقف على حيله، وكان عايز يقرب مني، بس شاورت بإيدي بهدوء وقعدت جنب أبويا.
بصيت لطارق وقولتله بصوت هادي ورزين، بس كل حرف فيه كان طالع زي السيف
حمد الله على السلامة يا طارق.. زمان كنت فاكرة إن الحب والنية الطيبة كفاية عشان أعيش في بيتك، بس اكتشفت إن النية الطيبة مع اللي مبيتقيش ربنا بتعتبر سذاجة وقلة حيلة.. وعشان نفتح صفحة جديدة، عندي شروط مفيهاش فصال ولا نقاش.. تقبل بيها وتنفذها قبل ما رجلي تخطي عتبة بيتك، يا إما نخلص بالمعروف.
طارق رد بلهفة وعينيه عليا
قولي يا نورهان، رقبتي سدادة لكل اللي هتقوليه!
عديتهم على صوابعي قدام عمه وقدام أبويا
أولاً العمارة دي أنا مش هعيش فيها دقيقة واحدة تانية!
طارق اتفاجئ وبصلي، فكملت بحسم
شقتنا اللي فوق تتقفل أو تتباع، وتنقلني في شقة تانية مستقلة بعيد عن بيت أهلك.. شقة ميكونش لحد فيهم مفتاح ليها، ولا يقدروا يدخلوها من غير إذني واستئذاني، زيي زي أي غريبة!
طارق بلع ريقه وبص لعمه، وعمه هز راسه بالموافقة وقال
حقها يا ابني.. البيت اللي فيه فتنة لازم تبعد عنه، وده أول طريق النجاة لبيتك.
طارق بصلي وقال
موافق يا نورهان، دافع مقدم شقة إيجار في الحي الجديد من تلات أيام ومستني بس موافقتك.
ابتسمت بهدوء وكملت
ثانياً خدمتي وواجبي في الدنيا دي هو لبيتي ولك إنت وبس! أهلك ليهم مني الاحترام من بعيد لبعيد، الزيارات في المناسبات وبحضورك، مفيش حاجة اسمها نزول فجر ونزول سوق ونقور محشي وخدمة عزومات! بنتها تخدمها، وإنت تصرف عليها وتبرها من جيبك وصحتك، ده فرض عليك وأنا مش همنعك عن بر أمك.. بس أنا مش شغالة مجانية في البيت الكبير!
طارق قال بندم حقيقي
أنا اللي كنت غلطان وظالم يا نورهان لما شيلتك فوق طاقتك وخليتهم يستقووا عليكي، والله العظيم حقك، ومن النهاردة أمي هجيبلها واحدة تخدمها باليومية على حسابي، وإنتِ ملكيش علاقة بأي شغل في بيتها نهائي!
بصيتله في عينه وقولت الشرط الأخير
ثالثاً والأهم مفتاح بيتي ده خط أحمر.. والشك فيا خط أحمر أكبر! الكلمة اللي تتقال عليا متتصدقش، والراجل اللي ميكونش ضهر لمراته ميبقاش راجل في نظري. الشروط دي تتكتب في وصل أمانة وتعهد في ورقة رسمية بينك وبين أبويا، عشان لو يوم فكرت ترجع في كلامك، يبقى حقي محفوظ في المحاكم قبل ما يكون في البيوت.
طارق قام من مكانه، ومسك إيد أبويا باسها، وقرب مني وحط راسه في الأرض قدام عمه وقال
كرامتك على راسي يا نورهان، والله العظيم ما هكسرلك كلمة طول عمري، والدرس اللي اتعلمته في الشهر ده كفاني لآخر يوم في عمري.. عرفت مين اللي بيحبني بجد ومين اللي كان عايز يخرب بيتي عشان أنانيته!
عم طارق طلع ورقة وكتب فيها التعهد وكل الشروط اللي طلبتها، وطارق مضى وبصم عليها وهو راضي ومبسوط، وحط دهب جديد في إيدي كان شاريتهولي هدية صلح ورد اعتبار غير شبكتي الأصلية.
بعد يومين اتنين، كنت بنقل عفش شقتي في عربيات النقل الكبيرة..
نزلت في مدخل العمارة القديمة عشان أودع الجيران اللي حبوني، ولقيت حماتي واقفة ورا باب شقتها، باصة عليا من ورا الستارة، مكسورة وعينيها مدمعة ومليانة خزي، وأسماء بنتها قاعدة وراها ساكتة زي الميتين بعد ما الفضيحة اتعرفت في العمارة كلها إنها اتهمت مرات أخوها بالباطل.
