الحقيقة نزلت عليه زي المطرقة.. الحقيقة اللي كان أعمى عنها شهور طويلة، الست اللي عاش يقدسها ويصدقها على حساب مراته وشرفه، كانت هي اللي بتدبر الخراب بإيدها وبتزرع الشك والفتنة في بيته عشان ترضي غيرتها وتحكمها الأعمى!
طارق أخد نفس طويل كأن روحه بتطلع منه، وقرب من أمه خطوتين، وصوته اتقلب من الزعيق لهمس مرعب تقيل
ده إنتِ يا أمي؟.. ده إنتِ اللي بتعملي فيا كده؟ بتلبسي مراتي مصيبة عشان أطلقها وأفضحها وسط الناس؟! أنا ابنك اللي شقيان عشانكم وكنتِ هتدمريني وتضيعي مستقبلي عشان حتة نومة؟!
حماتي مدت إيدها تلمس كتفه وهي بتقول بعياط حقيقي المرة دي
يا طارق يا بني افهمني.. أنا خايفة عليك، البت دي هتاخدك مني..
طارق نفض إيدها بحزم من على كتفه، وزعق بصرخة ألم قطعت قلوبنا كلنا
تاخدني منك؟! تقومي تخربي بيتي وتتهمي مراتي في شرفها وأمانتها وتخلوها سارقة ومدمنة بالحبوب دي؟! ده أنتوا اللي مخطئين مش هي!
لف طارق وشه لأخته أسماء، وضربها قلم على وشها رن في أرجاء الشقة كلها، وخلاها تقع على السرير وهي بتصرخ
وده عشان تتعلمي إزاي تعملي مصلحة على قفا شرف أخوكي وكرامة مراته!
طارق اتنفس بصعوبة، ومسح دموعه بكم قميصه، ولف وشه ناحيتي..
كان باصصلي بنظرة كلها ندم وعار، نظرة راجل حاسس إنه وطى راسه في الأرض قدام الست الوحيدة اللي كانت مخلصة له واستحملت عشانه كل الذل ده من غير ما تشتكي.
قرب مني بخطوات تقيلة، وحط إيده على راسي وهو صوته بيتهدج بالدموع
حقك عليا يا نورهان.. وحياة ربنا حقك عليا، أنا كنت أعمى ومغفل.. أنا آسف، اضربيني واعملي فيا اللي إنتِ عايزاه، بس بلاش تبصيلي بنظرة العتاب دي!
رجعت لورا خطوة واحدة، وشيلت إيده من على راسي بهدوء قاسي، وبصيتله في عينه وقلتله
الأسف مبيصلحش اللي اتكسر يا طارق.. إنت مكنتش مصدقني من البداية، مكنتش شايفني أصلاً.. كنت شايف إن أمك ملاك ومبتغلطش، وإن أنا الغريبة اللي جاية أسرق ابنها وأخدمهم ببلاش!
بصيت لحماتي اللي كانت بتبصلي بكسرة وخزي، وبصيت لأسماء، ورجعت بصيت لطارق وقلتله بكلمات تقيلة قطعت كل حبال الوصل
أنا سكت على الإهانة والخدمة والتعب وقلة النوم، لكن لحد الشرف والكرامة والاتهام بالباطل، خلاص.. كفايتي منكم لحد هنا! بيتك وشقتك وعيلتك هسيبهملك تشبع بيهم، وأنا دلوقتي حالا مروحة بيت أبويا، وورقة طلاقي توصلني هناك!
لفيت ضهري ومشيت ناحية باب الشقة بخطوات ثابتة وراسي مرفوعة لفوق، وطارق كان بيجري ورايا على السلم وهو بينادي عليا بانهيار
نورهان استني! نورهان والله ما هسيبك تمشي! اسمعيني أرجوكي!
الفصل الثالث والأخير رد الاعتبار وشروط من لهيب
نزلت سلالم العمارة خطوة بتسابق خطوة، وطارق نازل ورايا ينهج وينادي باسمي، وصوته مالي مدخل العمارة والشارع كله
استني يا نورهان! عشان خاطر ربنا اقفي دقيقة واحدة بس.. متخرجيش من البيت وإنتِ بالحالة دي! والله العظيم هصلح كل حاجة، اللي تطلبيه هيتنفذ!
ملفتش وشي ليه ولا حتى بصيت ورايا، كأني مكنتش سامعة صوته أصلاً. طلعت على أول الشارع، شاورت لأول تاكسي قابلني، ركبت وقفلت الباب في وشه قبل ما إيده تلحق أوكرة العربية. بصيتله من الإزاز وهو واقف مذهول وحاطط إيديه الاتنين على راسه، زي العيل التايه اللي ضيع أثمن حاجة في حياته بإيده وغبائه.
وصلت بيت أبويا بعد نص ساعة.. أول ما فتحت الباب وشوفت أمي، اترَميت في حضنها وانهارت في البكا. مش بكا ضعف ولا ندم، بكا واحدة حملت جبل فوق كتافها والنهاردة بس نزل من عليها.
أبويا كان قاعد في الصالة، قام اتخض لما شاف حالتي وطرحتي المبهدلة ودموعي اللي مش راضية تقف
في إيه يا نورهان؟ خير يا بنتي؟ جوزك جراله حاجة؟! حد زعلك هناك؟!
قعدت وشربت بق مية بالعافية، وحكيت لأبويا وأمي كل تفصيلة، من أول ما صحيت ٦ ونص الصبح عشان طلبات المحشي، وساعة النوم اللي عملوا عليها حكاية، للمؤامرة الدنيئة اللي دبرتها حماتي وأخته عشان يلبسوني قضية أخذ وشرف ويبوظوا سمعتي قدام جوزي. وطلعت تليفوني وشغلت لأبويا التسجيلات كلها وصوت حماتي بيكيد في المنور وصوت أسماء وهي بتخطط للدسيسة.
أبويا راجل هادي بطبعه ومبيحبش المشاكل، لكن أول ما سمع التسجيل، وشه اسودّ وعروق جبهته نطت، وقام وقف وقال بصوت كله هيبة وقوة عمري ما هنساها
وحياة لا إله إلا الله، لو جه هنا ووطى يبوس الأرض تحت رجلك، ما هتشوفي وشه تاني غير بشروط تجيبله هو وأهله داغ! بنتي متتبهدلش، ولا يتعمل عليها مؤامرات نسوان واطية زي دي! اقفلي تليفونك يا نورهان، ومن اللحظة دي إنتِ في حماية أبوكي، ومفيش بني آدم يقدر يمسك بكلمة.
قفلت تليفوني فعلاً، ورميته في الدرج.
الأيام الأولى كانت صعبة، ألم الفراق والغدر كان بينغز في قلبي، بس كنت عارفة كويس إن أي تنازل في اللحظة دي هيكون معناه نهايتي كبني آدمة ليها كرامة. لو كنت رجعت لطارق بسهولة وهو بيترجاني، كانت حماتي هتعرف إن كرامتي رخيصة وأي كلمتين حنينين من ابنها يمسحوا أي إهانة. كان لازم يتعلم الأدب.. كان لازم يحس بلهيب الفقد والخزي لحد ما يستوي على لهيب هادية.
عدا أسبوع.. وطارق تليفونه مبيفصلش على تليفون أبويا وتليفون أمي.
