أحمد: “نايمة كل ده ليه يا بت؟ فاكرة نفسك في إجازة ولا قاعدة في فندق؟ قومي لحسن والله ما إنتي رايحة الكلية النهاردة ولا رجليكي هتعتب بره البيت.. قومي اعملي فطار لأبوكي لحسن يطق!” عشق وهي بتفرك عينيها وبتقوم بتعب: “حاضر يا أحمد.. حالا هغير هدومي المبلولة دي اللي سيبتها بره في الندى، وهعمل الفطار على طول.”
أحمد بصوت عالي: “تعملي إيه إنتي كمان؟ لأ، إنتي هتعملي الفطار الأول وبعدين ابقي شوفي هدومك دي.. وبعدين أنا مالى مبلولة ولا لأ؟ يلا اخلصي!”
عشق بدموع في عينيها: “حاضر..”
الأب وهو داخل الصالة بزعيق: “فين الفطار يا ولية؟ هي بنتك الفاشلة دي ناوية تأكلنا المغرب ولا إيه؟ إنتي يا زفتة يا اللي جوه.. الأكل فين؟”
الأم وهي بتجري متوترة: “يعني هو أنا اللي مربية؟ مش عارفة عملت إيه في حياتي عشان البت دي تبقى بنتي.. يلا، ربنا يسامحني عليها.”
أحمد: “إيه، إنتي مش عايزة تفطري معانا ولا إيه؟”
عشق بصوت مخنوق: “لأ.. اصل اصل أنتو مش بترضوا تخلوني أكل معاكوا، وكمان باكل أكل قديم مش زي أكلكم، ولو قعدت معاكوا بتزعقوا لي وجسمي أصلاً وجعني من كتر الوقفة والشغل.”
الأب بصوت خشن: “عارفة ليه بنعمل معاكي كدة؟”
عشق بدموع: “ليه يا بابا؟”
الأب بجدية جافة: “عشان إنتي هنا خدامة وبس، ومش عايزين وجع دماغ.. يلا غوري على المطبخ كلي لوحدك.”
عشق بصوت مرتعش: “حاضر يا بابا.. أنا أسفة.”
خرجت عشق من المطبخ وهي مكسورة الخاطر، وخلصت شغل البيت بسرعة، وبعدها جهزت نفسها ولبست هدومها عشان تروح الكلية. وهي ماشية في الشارع، كانت بتدعي ربنا بصمت يخفف عنها الهم اللي هي فيه.
وصلت الكلية وحضرت أول محاضرة، وبعد ما خلصت، قعدت مع صحابها في الحديقة يضحكوا ويهزروا عشان تنسى الحزن اللي جواها شوية. وبعد المحاضرات، زي كل يوم، راحت على دار أيتام قريبة تحب تقعد مع الأطفال هناك وتلعب معهم، لأنهم بينسوها قسوة أهلها.
مديرة المدار وهي بتبتسم لشخص شيك واقف جنبها: “والله يا سليم بيه مش عارفة أقول لحضرتك إيه.. حضرتك بتتبرع بفلوس كتير أوي، ده غير الهدايا اللي بتجيبها للأولاد.. ربنا يجازيك كل خير.”
سليم وهو بيبتصم بهدوء: “أنا معملتش حاجة يا أمي، أهم حاجة الأطفال دي تفرح.. ودلوقتي عن إذنك، عاوز أدخل أقعد معاهم شوية قبل ما أمشي.”
مديرة الدار: “طبعاً يا فندم، اتفضل.”
دخل سليم للأطفال وكان بيتكلم معاهم وبيوزع الهدايا، وفجأة.. أول ما شافوا “عشق” وهي داخلة من الباب، سابوا سليم والهدايا وجريوا عليها بسرعة طائرين من الفرحة. سليم التفت وراه باستغراب عشان يشوف إيه اللي جرى وخلى العيال تسيبه كده.
عشق بضحكة صافية: “ازيكوا يا صحابي الحلوين.. عاملين إيه يا عفاريت؟”
الأطفال بصوت واحد: “احنا كويسين.. بس زعلانين منك!”
عشق باستغراب مصطنع: “أنا؟! زعلانين مني أنا؟ أخص عليا أنا وحشة عشان زعلتكم؟ أنا آسفة حقكم عليا.. بس صحيح، زعلانين مني ليه؟”
واحد من الأطفال: “عشان إنتي مجتيش امبارح!”
عشق بحنان: “امبارح كان مفيش كلية، وأنا مش باجي هنا إلا أيام الكلية.. سامحوني بقى.”
الأطفال: “خلاص.. مسامحناكي!”
عشق بضحكة شقاوة: “مممم.. أشطا، موافقة!”
كل ده كان تحت أنظار “سليم” اللي كان واقف مذهول.. مش فاهم هو بيبصلها كده ليه، ولا ليه قلبه بينبض جامد وكأنه هيطلع من مكانه. كان بيحدث نفسه ويقول: “في إيه يا سليم؟ أنا بوبصلها كده ليه؟ بس استنى.. هي حلوة أوي! لأ، مش حلوة وبس.. دي جميلة الجميلات، دي ملاك نازل من السما! ملامحها بريئة زي الأطفال بالظبط، وعينيها فيها جمال الدنيا بس مليانة حزن كبير.. ياترى إيه حكايتها؟ أنا هروح أصلي في الجامع وارجع تاني أشوفها.”
بالفعل، سليم راح صلى ورجع للدار، ودخل من الأبي وسرح وهو شايف عشق بتصلي في إحدى الغرف مع الأطفال بعد ما خلصوا اللعب، وكانت في آخر ركعة.
خلصت عشق صلاتها، وقالت وهي بتبتصم للأطفال: “يلا يا ولاد أنا لازم أمشى دلوقتي عشان متأخرش.”
الأطفال بحزن: “هتمشي خلاص؟ طب قعدي معانا شوية كمان.. شوية صغيرين خالص!”
عشق وهي بطبطب عليهم: “والله لو كان ينفع كنت قعدت.. متزعلُوش، هجيلكم تاني اتفقنا؟”
الأطفال: “اتفقنا!”
سليم كان واقف بعيد بيبصلها بحب وإعجاب شديد، ولقى نفسه بيمشي وراها من غير ما يحس. حتى إنه ساب عربيته وأمر الحراس يستنوا قدام الدار، وهو كمل ماشي وراها في الشارع عشان يشوف هتروح فين.
وهو ماشي وراها، شاف طفل صغير قاعد على الجنب بيعيط بحرقة. قربت منه عشق بسرعة وسألته: “مالك يا حبيبي بتعيط ليه؟”
الطفل بصوت منشج: “ماما هتضربني عشان ضيعت الفلوس في الشارع!”
عشق بطيبة: “خلاص متعيطش.. قولي الفلوس كام وأنا هديهالك.”
الطفل بفرحة ودموعه في عينه: “بجد هتهدهالي؟”
عشق وهي بتفتح شنطتها بحماس: “آه يا حبيبي..” بس لما فتحت الشنطة، لقت إنها معافهاش غير فلوس المواصلات بتاعتها وبس! مع ذلك، من كتر طيبتها، طلعت الفلوس ومدتها له: “خدي يا حبيبي.. متعيطش.”
الطفل باستغراب: “بس.. إنتي شكلك معكيش فلوس غير دول.. هتروحي بيتك ازاي؟”
عشق بابتسامة دافية: “مش مشكلة يا حبيبي.. أنا همشي على رجلي شوية رياضة، بس إنتي خلى بالك من الفلوس وما تضيعهاش تاني ماشي؟”
الطفل: “ماشي.. شكراً يا أبلة!”
سليم كان واقف متابع الموقف كله وهو منبهر بجد ومنتفض من الإنسانية دي. كان بيحدث نفسه ويقول: “هي البت دي حقيقية ولا أنا بيتهيألي؟ يعني مكنش معاها غير فلوس المواصلات وادتها للولد الغلبان ده، وهي هتمشي على رجليها عشان ميزعلش؟ دي فعلاً ملاك ماشي على الأرض!”
في اللحظة دي رن تليفون سليم، ففتح لقى مدير أعماله بيكلمه يقوله إنه تأخر على اجتماع مهم في الشركة. كان سليم نفسه يكمل مشي وراها، لكن الاجتماع كان لازم، فأمر حارس من رجاله يفضل ماشي وراها من بعيد ويعرف كل حاجة عنها لحد ما يخلص شغله.
