هايدي ابتسمت ومسكت ايديه ..
متقلقش حبيبي انا جمبك
عدي كمل وهو في دنيا تانيه ..
ريهام انا بحبك متسبنيش خليكي معايا …. ريهام متمشيش خليكي … انتي حبيبتي و ست البنات كلهم ا انا عايزك … ريهام .. ريهام
ابتسامتها اختفت بالتدريج من علي وشها والصدمة كانت مسيطرة عليها ريهام دا اسم طليقتة … طليقتة اللي اول ما اكتشفت أن عدي مستحيل يخلف طلبت الطلاق فورا واتمسكت بيه وبعد طلاقهم ب ثمن شهور اتجوزت ابن عمها وخلفت كمان منه … ازاي لسه في قلبه لحد دلوقتي ؟ طب وهي هي ايه بالظبط بالنسبالو
وفجأة لمعت الدموع في عينيها وافتكرت كل مرة كانت في حضنة وبتقوله فيها بحبك وهو بيرد ((( بموت فيكي يا ست البنات )))
❈-❈-❈
مكة فضلت مستنيه انس طول الليل كانت جواها طاقه غضب كبيرة حالفه ل تطلعها كلها عليه لمجرد أنه اتجرء وعلي صوتة عليها
وصل انس بعد يوم كله تعب عمليات كتير و كشوفات اكتر كان مهدود وكل اللي نفسه فيه بس يرتاح علي السرير وينام … مجرد ما فتح الباب اتفاجا ب مكة واقفة في نص الصاله اتنهد بتعب
مكة بسخريه …
حمد لله على السلامه يا دكتور
انس …
الله يسلمك ايه مصحيكي لحد دلوقتي ؟
مكة ..
مستنياك طبعا ولا انت فاكر أن لما كل يوم تتأخر برة هترجع تلاقيني مخمودة وترتاح بقا ؟
انس …
مكة انا جاي تعبان جدا بجد ومش قادر اتكلم ممكن ناجل الخناقة دي للصبح ؟ اكون نمت بس
عمار في شغله مركز في القضية الجديدة اللي ماسكها كانت قضية غسيل أموال لناس كبيرة في البلد وبيحاول يوصل ل دليل مادي عليهم هو والفريق المكلف معاه بالمهمة
تلفونة رن بصوت رساله علي الواتس فتحها كانت من لمار …
صباح الفل يا حضرة الظابط معتز مسافر يومين وانا جيالكم في الطريق هقضيهم معاكم انا مبسوطة اوي من زمان مقضناش وقت طويل مع بعض حضر نفسك بقا لسهرة للصبح واعمل حسابك مفيش اعذار انا مش باجيلكم كل يوم يعني يلا سلام
عمار اتنهد بغلب وهو بيتخيل اليومين دول هيعدو عليه ازاي واللي ضايقه اكتر التوقيت هو دلوقتي محتاج لكل تركيزة وطاقتة عشان القضية اللي معاه مش عشان يفض بين اختة مراتة دعي ربنا أن اليومين دول يعدو علي خير و رجع كمل شغله تاني
عدي وقت بسيط كانت لمار وصلت عند ابتسام وكلها حماس وفرحة
ابتسام …
طمنيني عليكي وعلي حبيبه تيته اللي جوة دي عامله ايه ؟
لمار …
الحمد لله يا ماما الدكتورة اخر مرة كنت عندها قالتلي كله تمام
ابتسام …
محددتش معاد لسه ؟
لمار …
لا بتقولي تقريبا لسه شهرين انا حاليا في اخر السابع لسه مخلصتوش
ابتسام …
مع زهرة تقريبا هي كمان في السابع ربنا يقومكم بالسلامة يارب انتم الاتنين
لمار …
امين يارب اومال هي فين صحيح مجتش يعني هي متعرفش اني جايه ولا ايه ؟
ابتسام بحزم …
لا متعرفش يا لمار وبقولك ايه شيليها من دماغك شوية هه مش لازم هزارك التقيل اللي محدش يستحمله دا انا بقولك من اولها اهو
لمار كشرت ..
في ايه يا ماما هي لحقت تشتكي وتقومك علي بنتك ولا ايه ؟
ابتسام …
الشهادة لله هي لا اشتكت ولا اتكلمت اصلا بس انا بشوف بنفسي طريقتك معاها وبشوف الحزن في عينيها وهي مبترضاش تعمل مشكلة
لمار بتريقة …
تعمل مشكلة ؟ مشكلة ايه دي أن شاء الله اللي تقدر تعملها ست زهرة ؟ احب اعرف يعني
ابتسام …
مفيش فايدة فيكي بقولك ايه انا مش قادرة علي مناهدة دي اللي اقولو تعمليه وخلاص
لمار سكتت بس كانت متغاظة من جواها من دفاع امها المستمر عن زهرة واللي كان بيزيد جواها الغل الغيظ من زهرة اكتر واكتر قامت دخلت اوضتها وهي بتفكر المرة دي ازاي تعكنن عليها من غير ما حد يكلمها كلمة واحدة وابتسمت بانتصار لما عرفت الطريقة أو الشخص اللي هتستخدمة عشان يعكنن هو علي زهرة وهي تفضل بعيد
عمار …
بجد يا ماما عادي يعني ولا اتصل بالدكتور ؟
ابتسام برفعه حاجب …
انت هتخاف علي بنتي اكتر مني ولا ايه ؟ قلتلك دا طبيعي في حملها اطلع يلا انت كمان اطمن علي مراتك اللي طلعت تعبانة دي اتفضل
عمار طلع جري علي زهرة فتح الباب بهدوء عشان لو نايمة واول ما دخل الاوضه لاقاها قاعدة علي السرير وبتعيط في صمت قرب عليها
عمار …
حبيبتي عامله ايه دلوقتي ماما بتقول انك طلعتي عشان تعبانة طمنيني عنك ؟
زهرة بصتله بلوم ومردتش عليه
عمار …
زهرة حقك عليا انتي عارفه اني مقصدش ازعلك بس مينفعش تيجي تقعد يومين معانا وازعلها مني
زهرة بصوت مخنوق …
بس ينفع تزعلني انا مش كدة ينفع كل مرة تيجي عليا انا قدامها وتصالحني بينك وبيني صح ؟
عمار …
انا مقصدش ازعلك يا حبيبتي أن شاء الله بكرة تخلف وتنشغل بالبنوتة بتاعتها والمشاكل دي كلها تخلص خلاص بقا خلي قلبك ابيض يا زهرتي أنني عارفه اني بحبك صح
زهرة …
عمار انا تعبت من وضع دا بجد
عمار …
وعد يا زهرتي لو بعد ما تقوم بالسلامة من الولادة الوضع متحسنش انا هتصرف
زهرة …
هتتصرف ازاي يعني ؟
عمار …
زهرة خلاص بقا قلتلك مسأله وقت والوضع هيتغير
زهرة بإصرار …
لا احب اعرف لو هي متغيرتش انت هتتصرف ازاي ؟
عمار …
مش مفكر في حاجة محددة يا زهرة بس وعد اني هتصرف
زهرة …
طب يا عمار لو هي بعد ما تولد متغيرتش ودا شيء انا واثقه فيه يبقي وقتها لو سمحت اي وقت هي تكون موجودة انا هقعد هنا في شقتي مش هتجمع معاها في اي مكان تمام ولا ايه ؟
عمار بضيق …
نعم ! عايزاها تتحرم تدخل بيت اخوها الوحيد ولا ايه ؟
زهرة …
لا طبعا بس اولا يا عمار هي مش بتدخل هنا ديما بتكون يا في شقه ماما ابتسام يا في شقه مرات عمي محسن في التجمعات ثانيا اي وقت تدخل بيت اخوها طبعا دا بيتها قبل ما يكون بيتي وقتها انا بكل هدوء هنزل عند اي حد مرات عمي أو ماما أو حتي هايدي
عمار …
زهرة متكبريش المواضيع لو سمحتي
زهرة …
والله انا كدة مش بكبرها انا بشوف حل من غير اي تصادم بين اي أطراف
عمار منهي الحديث …
خلاص يا زهرة لو متغيرتش بعد الولادة هعملك اللي انتي عايزاة مرضيه كدة يا ستي
زهرة …
اه مرضيه وربنا يصبرني شهرين اللي فضلين دول
عمار …
طب ايه هتقدري تسهري معايا شوية ولا تعبانة فعلا انتي وحشاني اوي
ابتسام …
بس بس في ايه اهدي ع نفسك شوية نازله تفطر معانا كنا مستنين حضرتك تصحي ياساتر عليكي قطر بيحدف دبش وهو ماشي
لمار متكلمتش وقامت تدخل الحمام من غير كلام وبعد وقت بسيط كانت زهرة نزلت وقاعدين كلهم يفطرو سوا
لمار …
يعني عمار مكنش عارف يأخر نفسه شوية عشان يفطر معايا أو حتي ياخد انهاردة نص يوم عشان يقعد معايا بدل امبارح اللي مش عارفه مين بصلي فيه دا
ابتسام …
ما قلتلك عدى عليا الصبح وهو رايح الشغل وقال هيرجع بدري في ايه للندب دا علي الصبح مش حلو
لمار …
ماشي سكت اهو ( وبصت ل زهرة ) الا صحيح يا زهرة انتي مبتتوصليش خالص من خالتك اللي في اسكندريه ؟
زهرة بهدوء …
لا طبعا بتواصل معاها علي طول بكلمها واسال عليها وهي كمان بتكلمني تسال عليا ديما
لمار ….
علي كدة بقا هتجيلك لما تولدي ؟
زهرة …
لما أولد لا مظنش خالتو كبرت و مظنش تقدر علي سفر رايح جاي في نفس اليوم وغير بيتها واولادها مش هينفع تسيبهم وانا اكيد مش هزعل أنا مقدرة دا
لمار …
تسافر وترجع في نفس اليوم ازاي ؟ انا اقصد تقعد معاكي كام يوم بعد الولادة اكيد مش هتقدري تخدمي نفسك يعني
ابتسام …
متشغليش بالك انتي بالكلام دا هي أن شاء الله مش هتحتاج لحد وبعدين انا معاها اكيد مش هسيبها
لمار كشرت …
نعم معاها ازاي ؟ وانا هتسيبيني ولا ايه أن شاء الله ؟ انتي عايزة أهل معتز يأكلو وشي ويقولولي امك فضلت مرات اخوكي عليكي ؟
زهرة بحرج …
اكيد لا طبعا ماما هتكون معاكي انتي هي مش قصدها كدة
ابتسام ….
انتي خلاص واثقه ومتاكدة انكم هتولدو مع بعض وفي نفس اليوم كمان ؟
لمار …
احنا الاتنين معادنا قريب اوي من بعضه لو مش في نفس اليوم اكيد في نفس الاسبوع الوضع هيكون ايه بقا ؟
ابتسام …
لا حول ولا قوه الا بالله هريحك يا لمار هروحلك انتي الصبح واخر النهار هاجي ل زهرة ولما اسيبك حماتك هتكون معاكي ولما اسيب زهرة مرات عمك ايمان هتكون معاها ها ارتحتي كدة ؟
لمار كشرت …
ياسلام وليه متبتيش معايا ؟ وليه الشحططة دي تروحي وترجعي وتخدمي هنا وهنا ؟ ماهي تكلم خالتها تجيلها ولا تشوف حد من عيلتها اللي رمين طوبتها دول وانتي تكوني مع بنتك
زهرة وهي بتمنع نفسها تبكي ….
لو سمحتي يا لمار تتكلمي من غير غلط قلتلك ماماتك هتكون اكيد معاكي يبقي متجبيش سيرة اهلي بأي كلمة
التلاتة قعدو بسرعه عشان يتلاشو غض*بة
محسن :
نبدء بالغض*بان اللي بيقول لعمو اللي في مقام أبوه متدخلش يا عمي (وبص لزهرة) اتكلمي يا زهرة متخافيش
