لست حبيبتي بقلم الكاتبة نرمين عادل همام في ليلة زفافنا، وضع قدامي شيكًا على بياض وورقة اتفاق، وقال لي وبكل برود: اللي كنت أتمنى أتجوزها وأعيش معاها مش أنتِ، وهطلقك بعد 3 سنين. بصيت للورقة والشيك وفكرت مع نفسي كام ثانية، وبصيت له وبكل هدوء سألته: يعني بعد الثلاث سنين لما نطلق، الفيلا تتكتب باسمي هي كمان؟ عاصم تنح وسكت شوية. يمكن في حياته كلها ما شافش ست يكسر قلبها ويقولها ما بحبكيش، تقوم هي في نفس اللحظة تقلبها حسابات وتفكر في تقسيم التركة وتسأل عن حقها! رد عليا بعد فترة وهو مستغرب: أيوه، بتاعتك. ما كذبتش خبر ومضيت اسمي وأنا مبسوطة والابتسامة مالية وشي. ودارت الأيام وعدت الثلاث سنين. في ليلة ذكرى جوازنا، اكتشفت إني حامل. وفي نفس الليلة دي بالضبط، رجعت مصر الست اللي فضل قلبه متعلقًا بها وعاش يعشقها. فضل واقف في البلكونة يفكر وقت طويل. وما التفتش ناحيتي إلا لما كان قد مر وقت طويل. ولأول مرة أشوف الفرحة بتلمع في عينيه اللي طول عمرها باردة وما بتتحركش. قال لي: ياسمين رجعت مصر. إيدي اللي كانت على بطني اتجمدت مكانها. ورقة السونار اللي كنت مجهزاهاله عشان أفاجئه بيها كانت لسه مستخبية في جيب الجاكيت. سكت كام ثانية وأنا بطلع النفس بالعافية، وطويت الورقة كذا تطوية ورجعتها في جيبه في السكات. رديت وأنا بحاول أجمع نفسي: بجد؟ عاصم كان بيبص لي ومستني يشوف انهياري. ابتسمت له ابتسامة هادية وقلت له: ألف مبروك يا سيدي.. كده كده الاتفاق اللي بيننا وقته خلص النهارده. نعدي بكرة على المأذون ونخلص كل حاجة بالمعروف. اللمعة اللي كانت في عينيه انطفت في ثانية، والضحكة اتسحبت من وشه وحل مكانها الذهول. عاصم ما وافقش على الطلاق فورًا. مش عشان مش عايز، لا.. عشان عيد ميلاد جدته الثمانين كمان ثلاثة أيام. جوازي منه في الأصل كان ترتيب من العيلة عشان نرضيها. الست كبيرة في السن وصحتها على قدها، ولو عرفت بطلاقنا دلوقتي مش بعيد تقع فيها. عشان كده لما قال لي: نتكلم في الموضوع ده بعد عيد ميلاد الجدة. رديت بهدوء: تمام، ماشي. قمت عشان أطلع أوضتي فوق، وبعد خطوتين افتكرت حاجة مهمة فلفيت له تاني: صحيح.. الفيلا اللي على النيل، أوعى تنسى. كان بيصب لنفسه كوبًا، حركته اتجمدت في الهواء. كملت حساباتي قدامه: غير الـ 10% من أسهم الشركة اللي وعدتني بيها، والشقة اللي في وسط البلد.. العربية البنتلي خليها معاك مش عاجبني لونها. حط الكوب على الطاولة بقوة. تكة الزجاج هزت المكان وهو بيبص لي بنظرة حادة: فريدة! قلت له ببرود: نعم؟ سألني وهو بيضيق عينيه: هي دي بس الحاجات اللي هامكي؟ استغربت ورديت: أومال يعني إيه اللي يهمني غير كده؟ فضل يبص لي كتير والضوء جاي على وشه مخلّي نظراته أغمق، وبعد لحظة ضحك بمرارة: ولا حاجة.. مش هخلف بوعدي معاكي. قلت له: يبقى تمام. لفيت نفسي عشان أطلع، وأول ما حطيت رجلي على أول درجة في السلم حسيت بنغزة ووجع خفيف أسفل بطني. حطيت إيدي على بطني من غير ما أحس، فجه صوته من ورايا فجأة: مالك؟ حاسة بتعب فين؟ نزلت إيدي بسرعة وقلت له: أصل أكلت كتير بس. كشر وقال لي: أنتِ ما أكلتيش غير نص طبق شوربة. رديت عليه ببرود: ولا يهمك. ما ردش، وأنا ما لفيتش وبصيت له. أول ما قفلت باب أوضتي عليا، طلعت ورقة السونار المكرمشة. كان فيها نقطة صغيرة أوي، أصفر من أن تشاف بالعين. الدكتورة قالت لي وقتها: الجنين عمره ست أسابيع. ست أسابيع! قعدت على طرف السرير وأنا بحسب الأيام. كانت الليلة دي لما عاصم رجع مرهقًا جدًا وغير مدرك لما حوله بعد حفلة الشركة، وكانت المرة الوحيدة في الثلاث سنين اللي تغير فيها كل شيء. تاني يوم الصبح لما صحي فضل ساكت كتير، وما نطقش غير بكلمة واحدة: أنا آسف. فاكرة إني ضحكت ساعتها وقلت له: ولا يهمك، تحصل. كنت فاكراها غلطة وعدت، لكن بعد ست أسابيع اتخلقت الحياة الصغيرة دي. وطيت راسي بصيت لورقة السونار، وطلعت تليفوني فتحت النتيجة. عيد ميلاد الجدة بعد ثلاثة أيام. العملية بعد أربعة أيام. سفري لسويسرا بعد خمس أيام. حجزت الطيران من غير ما عاصم يعرف، وما كانش عندي أي نية أقوله. لأن من الأول خالص، كان فيه بند واضح صريح في اتفاقنا: لو حصل حمل غير مخطط له، القرار الأول والأخير يرجع للست. والجواز ده ما كانش فيه مكان لطفل.. ولا كان فيه مكان ليا من الأساس. أنا أعرف عاصم من لما كان عمري سبعتاشر سنة. في السنة دي أبويا اتوفى في حادثة، وشغل عيلتنا كله فلس. أمي كانت متوفية من زمان، وأقاربنا يهربوا مني زي ما أكون دين على رقبتهم. الشخص الوحيد اللي وقف جنبي كانت الجدة.. أخدتني بيتها، أكلتني وعلمتني وفتحت لي بيتها. وهناك.. شفت عاصم لأول مرة. كان أكبر مني بثلاث سنين. أول لقاء بيننا كنت واقفة تحت المظلة والمطر مغرقني، وهو راجع من مدرسته بالقميص الأبيض ورافع شمسية سودة. لما شافني سأل البواب: مين دي؟ البواب رد: دي الآنسة فريدة. عاصم هز رأسه ومشي من جنبي.. وبعد كم خطوة رجع تاني ورمى في إيدي فوطة نظيفة كانت معاه. وقال لي: نشفي. دي كانت أول كلمة قالها لي. وبعد السنين دي كلها، بقيت أقول لنفسي: يا ريتك كنت أبرد من كده اليوم ده.. يمكن ما كنتش حبك! أيوه.. أنا كنت بحب عاصم. ما حدش كان يعرف.. ولا هو نفسه كان يعرف. فضل حب مكتوم من سن السبعطاشر لحد ما تمت السبعة وعشرين.. عشر سنين كاملين. بس لما كملت العشرين، ظهرت في حياته بنت اسمها ياسمين. جميلة، وواثقة في نفسها، وشقية.. عكسي تماماً. قدام الناس عاصم كان دايماً بارد وشايف نفسه، بس مع ياسمين كان ممكن ينزل على الأرض يربط لها جزمتها، أو يسوق العربية ثلاث ساعات عشان يجيب لها أكلة بتحبها، أو حظه يلغي اجتماع مهم عشان هي سخنة. أول مرة شفتهم في لحظة قرب، كان في الجنينة الورانية بتاعة البيت. كان التلج بينزل في اليوم ده زي المطر. وقفت ياسمين على أطراف صوابعها وعصرت نفسها وهي في لحظة قرب منه، والرجل اللي كان بيكره أي حد يلمسه من صغره، وطي لها بلهفة واحتضنها بهدوء. كنت واقفة ورا الباب الزجاج، وفي إيدي الكوفية اللي فضلت أغزل فيها شهرين كاملين. في الليلة دي، قعدت أفك فيها غرزة غرزة.. خيط ورا خيط، ولما طلع النور ما كانش فاضل منها حاجة. وقلت لنفسي ساعتها: خلاص.. أنا مش بحبه. بعدها ياسمين مشيت وسابت البلد. مش عشان عيلة عاصم رفضتها، لا.. هي اللي اختارت واحد تاني أغنى وأهم. يوم خطوبتها، عاصم استناها في الفندق خمس ساعات كاملين، وما ظهرتش. سابت له ورقة مكتوب فيها: “عاصم.. أنا آسفة، مش هقدر أقضي بقية عمري مجرد حرم عاصم بيه.” وتاني يوم سافرت أوروبا مع مخرج مشهور. وفي نفس اليوم ده، أسهم شركات عيلة عاصم نزلت الأرض بسبب الفضيحة. الجدة تعبت جداً ونقلوها المستشفى، وبعد شهرين استدعتنا أنا وهو وقالت لنا بوضوح: اتجوزوا. ما لحقتش حتى أرد، لكن عاصم رد في ثانية: تمام. كلمة واحدة من غير تردد. بسذاجة مني افتكرت إنه خلاص نسيها، أو يمكن العشرة بيننا كبرت في قلبه حاجة. لحد ليلة الزفاف.. لما حط الاتفاق قدامي: ثلاث سنين. لا تدخل في الخصوصية. لا مشاعر ولا حب. وممنوع خلفة. وبعد الثلاث سنين، لو أي حد فينا عايز ينهي الموضوع، التاني ينفذ من غير كلام.. ومقابل ده هيديني أسهم وعقارات وفلوس تؤمن لي حياتي. خلصت قراية ورفعت راسي سألته: أنت لسه بتستناها؟ سكوته كان هو الجواب. وفي اللحظة دي، ماتت خمس سنين من الحب المكتوم من طرف واحد. مسكت القلم ومضيت: تمام.. طالما ما فيش حب، افتكر بس تدفع كويس. بص لي عاصم وقتها، ويمكن من اللحظة دي افتكر إن كل اللي يهمني هو الفلوس. عادي.. سوء الفهم ده ما كانش يضايقني، بالعرف والتحضر فارقنا بعض بالمعروف. الثلاث سنين اللي عشناهم مع بعض كانوا هاديين بشكل غريب. عاصم عمره ما جاب ست البيت، وأنا عمري ما سألته رايح فين ولا جاي منين. في الإجازات نطلع على البيت القديم نتغدى مع الجدة، وفي الحفلات أقف جنبه وإيدي في إيده. قدام الناس كان بيسحب لي الكرسي، ويمنع عني ما يضرني، وحافظ إن عندي حساسية من السمك. وأنا كمان كنت حافظة إنه ما بيشربش قهوة بعد الساعة تمانية، وجسمه بيتعب لو فوت وجبة، وبيكره البرفانات الفاقعة. كنا بتمثل دور الزوجين المثاليين بشطارة لدرجة إن الكل افتكرنا عايشين في تبات ونبات. بس إحنا الاتنين بس اللي عارفين الحقيقة.. ورا باب أوضة النوم كان فيه أوضتين منفصلتين بينهم طارمة طويلة، ما حدش فينا خطى خطوة ناحية التاني فيها. إلا الليلة دي.. من ست أسابيع. بس خلاص، ده ما بقاش يفرق في حاجة.. ياسمين رجعت. تاني يوم الصبح لما نزلت، كان عاصم مشي. البواب قال لي: بيه نزل على المطار من الساعة ستة الصبح. وأنا بشرب كباية اللبن، إيدي وقفت في الهواء: المطار؟ أيوه يا هانم. فتحت التليفون، كانت الأخبار كلها نازلة: ياسمين ترجع مصر رسمياً بعد غياب ثلاث سنين في فرنسا! ونازلة لها صورة وهي طالعة من المطار بنظارة شمس ونظرة غرور، ووراها راجل مش باين منه غير نص وشه بس أنا عرفته في ثانية. التعليقات كانت مولعة: هو مش ده عاصم بيه؟ يا لهوي! ده راح يستقبل حبيبته القديمة في المطار بنفسه؟ بس عاصم متجوز! يا عم متجوز إيه، فريدة دي جوازة صالونات وعقد صوري! قفلت التليفون ببرود. الدادة كانت واقفة جنب الطاولة ومحتارة: يا هانم… رديت وأنا بخلص كباية اللبن: ولا يهمك يا دادة.. ابدأي من النهاردة جردي حاجتي وحضري الشنط. الدادة اتخضت: ليه يا بنتي؟ ابتسمت لها: هعزل. وما تقوليش لعاصم، هو مشغول دلوقتي. طلعت الأوضة وبدأت ألم حاجتي. ثلاث سنين اكتشفت إن مليش كراكيب كتير: هدومي، كام كتاب، وشوية مجوهرات. فتحت الخزنة الصغيرة، لقيت علبة قطيفة زرقا فيها توكة شعر قديمة على شكل وردة. دي كانت أول هدية يجيبهالي عاصم في عيد ميلادي الثمانطاشر. بصيت لها كام ثانية، وسبيتها مكانها في الخزنة وما أخدتهاش. فيه حاجات لما بتقعد كتير، بيبقى لازم نسيبها ونمشي. التليفون رن، وجاتلي صورة. ياسمين قاعدة جوه عربية عاصم، وجاكتته على كتافها. ومكتوب تحتها: (شكراً إنك أخدتي بالك من عاصم في الثلاث سنين اللي فاتوا نيابة عني. بعد عشر ثواني بعتت رسالة تانية: أنا في بيته دلوقتي. ضحكت.. بصماتها سريعة أوي على الكيبورد. كتبت لها: ما فيش داعي للشكر، افتكري بس تقوليله يحول لي الفلوس في ميعادها. سكتت وما ردتش، شكلها ما توقعتش الرد ده. وبعد دقيقة بعتت: هو أنتِ ما بتحبيهوش؟ بصيت للسؤال كتير، وفي الآخر كتبت: كنت. بس الكلام ده كان زمان أوي. لسه ببعت الرسالة، لقيت باب الأوضة اتفتح بفجأة. عاصم كان واقف على الباب ومصدوم. بص لشنطة السفر المفتوحة على الأرض، وللهدوم المتطبقة على السرير، ووشه تحول لكتلة ثلج: أنتِ بتعملي إيه؟ رديت وأنا بكمل لَمّ: بلم حاجتي.. مش أنت شفت؟ قرب ودخل الأوضة: قصدي بتلميها ليه؟ استغربت سؤاله جداً: هو إحنا مش هنطلق؟ سكت وما نطقتش. كملت تطبيق الهدوم، فجه صوته بعد فترة: ومين قال لك تمشي دلوقتي؟ رفعت راسي وبصيت له: هو إحنا مش كده كده هنفترق؟ ولا أنت ناوي تجيب ياسمين تعيش معانا هنا؟ أنا معنديش مانع على فكرة! أغلق باب الدولاب بقوة لدرجة إن البيت اتنهز. وقفت مذهولة. عاصم حط إيده على الباب وهو بيبص لي بنظرة مرعبة: فريدة! ما تجيبيش سريتها بالنبرة دي! بصيت له وفهمت في ثانية.. اتاري لسه بيغير عليها وبيحميها حتى مني. هزيت راسي وقلت بهدوء: تمام.. آسفة. أول ما نطقت الكلمة، وشه اتعصب أكتر. وفي نفس اللحظة دي، تليفونه رن باسم “ياسمين”. أنا شفت الاسم، وهو عرف إني شفته. الغرفة سكتت تماماً. سبقته وقلت له: رد.. يمكن محتاجاك. ما تحركش من مكانه، فلفيت كملت لمّ هدومي. في الآخر رد، وصوت ياسمين كان ناعم أوي وطالع من السماعة. ما عرفتش قالت إيه، بس عاصم كشر فجأة وقال: اثبتي مكانك.. أنا جايلك حالا. قفل وسحب نفسه على الباب، وقبل ما يخرج بصلّي: ما تلميش حاجة تاني.. استني لما أرجع ونتكلم. وأغلق الباب وراه. بصيت للأوضة الفاضية، وبعد لحظة كملت قفل الشنطة بالسوستة. خلاص.. انتهت. عيد ميلاد الجدة كان بعد ثلاثة أيام. كنت فاكرة إني همثل دور الزوجة المطيعة للمرة الأخيرة ونفضها، بس أول ما دخلت الصالة الكبيرة لقيت ياسمين واقفة جنبه بفساتين أبيض. المكان كله سكت، والكل عارف اللي حصل زمان وعارف الحكاية بيننا. قربت مني وابتسمت: فريدة.. عاش من شافك. رديت ببرود: أهلاً.. زمان عنك. بصت لخاتم جوازي وقالت بصوت واطي: فتكرتك مش هتيجي. قلت لها: وليه ما أجيش؟ ده عيد ميلاد الجدة، وبصفتي مرات حفيدها لازم أكون موجودة. كلمة “مرات حفيدها” جمدت الابتسامة على وشها. وفي اللحظة دي ظهر عاصم وجيه ناحيتي على طول من غير ما يبص لياسمين، وبص لجزمتي بكعب وقال: أنتِ مش كنتي بتقولي بتدوخي؟ لابسة كعب عالي ليه؟ استغربت إنه افتكر. رديت: عادي.. شكله حلو. كشر وطلب من الخدم يجيبوا لي جزمه واطية. الناس كلها كانت بتبص علينا، وياسمين عينها ما نزلتش من علينا. اتضايقت وقلت له بصوت واطي: عاصم.. ما فيش داعي للتمثيل ده. سألني: تمثيل إيه؟ حب الزوجين ده.. بكرة آخر يوم بيننا. عينيه أظلمت فجأة، وقبل ما ينطق، الجدة نادت علينا. مسكت إيدي وابتسمت: يا فريدة.. عدت ثلاث سنين، إمتى بقى هتفرحوني بعيل؟ اتجمت مكاني، ومن غير ما أحس حطيت إيدي على بطني. ثانية واحدة بس.. بس عاصم لقطها وعينيه نزلت على بطني فوراً: أنتِ… ما لحقتش أرد، لأن صوت صريخة جه من ورا.. ياسمين أغمى عليها! المكان اتقلب، وعاصم بص ناحيتها ثانية واحدة بس.. وكانت كفيلة إنه يجري عليها ويرفعها بين إيديه قدام الكل ويطلع بيها على برة من غير ما يبص وراه. الجدة كانت بتترعش من الغضب وتزعق: عاصم! بس ما وقفش. ضحكت في سري.. قبل ثلاث سنين أو بعد ثلاث سنين، ما فيش حاجة اتغيرت. الجدة مسكت إيدي وهي بتعيط، فوطيت عليها وقلت لها: يا تيتة.. بكرة أنا وعاصم هنطلق رسمياً. إيدها اتجمدت، فخلعت خاتم جوازي وحطيته في إيدها بالراحة: سامحيني.. بس المرة دي مش هقدر أستنى أكتر من كده. تاني يوم الصبح. قاعدة في مصلحة الأحوال الشخصية من الساعة تسعة. تسعة ونص.. عشرة.. أحد عشر.. وعاصم ما جاش. طلبت تليفونه ما بيلقطش، وفي المرة الثالثة رد المساعد بتاعه: يا فندم… قلت له على طول: عاصم فين؟ في المستشفى مع ياسمين؟ ..أيوه يا فندم. بصيت في الساعة.. كانت 11:17. ضحكت بمرارة وقلت له: تمام.. بلغه لو ما جاش قبل الساعة اثنا عشر، هرفع قضية طلاق خلع بنفسي. الساعة 11:58. عربية مايباخ فرملت بصوت عالي قدام الباب. نزل عاصم بقميص مكرمش ووش زي الثلج وقرب مني: فريدة! رفعت راسي: جيت؟ بص للورق اللي في إيدي وقال بغضب: هو أنتِ لازم تسوقي فيها وتوصليه للدرجة دي؟ قلت له باستغراب: مش ده اللي أنت عايزه من الأول؟ طلعت العقد اللي بيننا وحطيته قدامه: البند اثنا عشر: بعد ثلاث سنين، لو أي طرف طلب الطلاق، التاني ينفذ من غير شروط.. ده خط إيدك يا عاصم بيه. فضل يبص لإمضائه وقت طويل، وبعدين سأل فجأة: ولو قلت لك إني مش عايز أطلق؟ اتصدمت: إيه؟ العقد ده.. يلغى. بصيت له كام ثانية وبعدين انفجرت في الضحك: عاصم! ياسمين رجعت خلاص.. بتثمل عليا ليه تاني؟ حدقة عينيه ضاقت، فمسكت القلم وحطيته في إيده: امضي.. مش هقف في طريقكم ولا هاخد أكتر من حقي، ومن بكرة هختفي من حياتك خالص. كل كلمة كنت بقولها كانت بتخليه يتعصب أكتر، بس في الآخر مسك القلم وامضى بعنف كاد يقطع الورقة. بصيت للتوقيع ونفست براحة.. أخيراً الكابوس خلص. أول ما خرجت، المطر بدأ ينزل. وقفت تحت المظلة أطلب تاكسي، فجه عاصم من ورايا: أنا هوصلك. مش محتاجة. فريدة! لفيت نفسي وبصيت له، لقيت نظرة في عينيه فكرتني بليلة ما شفته أول مرة وأنا عندي سبعة عشر سنة. كان يوم مطر تاني. نفس المطر اللي خلاه زمان يرمي لي الفوطة.. بس إحنا الاتنين ما بقيناش نفس العيال بتوع زمان. ابتسمت له بهدوء: عاصم.. أتمنى لك ولها السعادة. نزلت الدرج، والتاكسي وقف قدامي. فتحت الباب، وبس قبل ما أركب، مسك إيدي فجأة بعنف: استني! لفت له، فعينه جت على الحقيبة المفتوحة وإيديها. كان باين منها طرف ورقة بيضا مكتوب فيها بوضوح: عيادة النساء والتوليد – حمل في الأسبوع السادس والأربعة أيام. عاصم اتنح، وإيده اللي مسكاني اتشدت زي الحديد: إيه ده؟! وطيت راسي، وقلبي كان هيقف.. شافها! قفلت الحقيبة بالراحة: دي حاجة ما تخصكش. وشه اتغير كلياً وصوته خرج بحشرجة مكتومة: فريدة.. أنتِ حامل؟! ما رديتش. سأل بحدة: من مين؟! أول ما نطق الكلمة دي، انفجرت في الضحك من غير ما أحس. يعني دي أول حاجة جت في بالك؟! ما سألتنيش من إمتى؟ ما سألتنيش حاسة بإيه؟ سألتني: من مين؟! بصيت للراجل اللي حبيته خمس سنين كاملين، وفي ثانية، كل أثر للحب ده اتمسح من قلبي. سحبت صوابعه من على إيدي صباع صباع: اطمن.. ده مش عيل هتحمل مسؤوليته. ركبت العربية وقفلت الباب. فضل عاصم واقف تحت المطر الغزير وشاحب جدًا. طلع تليفونه وطلب المساعد، وصوته كان يرعب من البرودة: راجع جدول أعمال فريدة كله في الشهرين اللي فاتوا! وقبل ما المساعد يرد، كمل بعصبية وحشرجة في صوته: لا لا.. مش جدول أعمالها! ادخل على حساباتي أنا.. افحصني أنا! شوفني عملت إيه.. الليلة اللي قبل ست أسابيع! بس عقبال ما افتكر الليلة دي.. كانت الطائرة بيا طارت بعيد عن البلد كلها. والحاجة الوحيدة اللي سبتها في البيت اللي عشنا فيه ثلاث سنين، كانت توكة الورق اللي جابها لي في عيد ميلادي الثمانطاشر، ومعاها ورقة صغيرة مكتوب فيها جملة واحدة: “عاصم.. المرة دي مش هستناك تاني.” بعد ثلاث ساعات. كان عاصم واقف في الأوضة الفاضية، ومسك ورقة السونار اللي الدادة لقتها تحت السرير. تاريخ الكشف كان نفس يوم ذكرى جوازنا.. اليوم اللي قال لي فيه: “ياسمين رجعت”. وفي أسفل الورقة، كانت فيه ملاحظة مكتوبة بخط إيدي رسمت جنبها وش بيضحك: “هقوله الليلة دي.” فضل باصص للورقة وقت طويل، وبعدين قعد على طرف السرير بالراحة. ولأول مرة في حياته، الراجل اللي طول عمره مغرور وبارد حس بكسرة ورعب حقيقي. لأنه دلوقتي بس فهم.. في الليلة دي، وقبل ما يقول لها “هي رجعت”.. كانت مراته ناوية تفاجئه إنها حامل في ابنهم. وفي اللحظة دي بس، أدرك حاجة أرعب بكثير: هو.. ما كانش عايز يطلقها أصلاً. الراجل اتساب ورا. عاصم عمره ما تخيل إن فيلته اللي مساحتها أكتر من ألف متر هتخليه يحس إنه بيتخنق جوه قفص. كان دايماً شايف إن فريدة ست هادية ومش بتاعة مشاكل. ما بتفتش في تليفونه، ما بتسألوش رايح فين ولا جاي منين ولا هيرجع إمتى، وحتى لما كان بيسافر شغل نص شهر، كان كل اللي بتبعته رسالة واحدة: افتكر تاكل في ميعادك. كان بيشوف الهدوء ده مريح، لأنه مش محتاج يبرر ولا يشرح، ولا حتى يرد على مشاعر مش عايزها. بس النهاردة، لما حاجتها اختفت من الأوضة، اكتشف عاصم حاجة غريبة.. الست اللي افتكر إنها ما سابتش أي أثر في حياته، كانت موجودة في كل حتة! الساعة اللي على الحيطة متقدمة خمس دقائق عشان هو دايماً بيصحى متأخر. درج المكتب فيه أدوية المعدة مقسمة في أكياس صغيرة ومعاها ورقة: ما تتعبش نفسك على معدة فاضية. على الرف، الملفات متستفة بالسنة. حتى كرافتته الرمادي المفضلة مغسولة ومكوية ومتعلقة في الدولاب. فضل واقف قدام الدولاب كتير، وبعدين سأل الدادة: دادة.. الحاجات دي.. هي اللي كانت بتعملها؟ الدادة ردت: أيوه يا بيه.. كانت بتقول إنك ما بتحبش حد يلمس حاجتك الشخصية، فكانت بترتب كل حاجة بإيدها. سكت عاصم، فكملت الدادة: في الحقيقة، الهانم كانت بتحبك أوي وتهتم بيك.. بس ما كانتش بتحب تتكلم. كشر وقال: تهتم بي؟ الدادة: أيوه.. اليوم اللي دخلت فيه المستشفى بسبب معدتك، فضلت صاحية طول الليل في الصالة.. واليوم اللي عملت فيه حادثة بالعربية كانت هي أول واحدة توصل.. والسنة اللي فاتت لما الشركة كانت في أزمة، باعت مجوهرات خاصة بيها عشان تجمع سيولة. التفت عاصم بسرعة ومذهول: باعت مجوهرات؟! أيوه يا بيه. عاصم ما كانش يعرف ده! كل اللي يذكره إن الشركة السنة اللي فاتت كان عندها أزمة سيولة، وفجأة اتضخ مبلغ من صندوق استثماري صغير حل الأزمة. لما سأل المساعد وقتها، قال له ده مستثمر خاص وما اهتمش. طلع تليفونه فوراً واتصل بالمساعد: طارق! أيوه يا عاصم بيه. اتأكد لي من الصندوق اللي استثمر معانا السنة اللي فاتت.. مين المالك الحقيقي له؟ بعد عشر دقائق، اتصل المساعد وصوته متردد: عاصم بيه… أنطق! المالك المستفيد الأخير من الشركة دي… هي الهانم.. فريدة هانم. السكون حل في الأوضة. بص عاصم لتوكة الوردة اللي في إيده، وسأل بصوت بحوح: فيه إيه تاني عنها أنا ما أعرفهوش؟ المساعد سكت شوية وبعدين رد بأسى: يمكن.. حاجات كتير أوي يا بيه. عاصم ضحك بمرارة.. ضحكة أشبه بالبكاء. ثلاث سنين عايش معاها تحت سقف واحد، وما بدأش يدور ورا مراته ويكتشفها إلا بعد ما مشيت وسابته! رن التليفون، وكان الاسم “ياسمين”. زمان كان بيرد في ثانية، بس المرة دي فضل يبص للاسم كتير قبل ما يرد: أيوة يا ياسمين. عاصم.. أنت فين؟ أنا خرجت من المستشفى والدكتور قال محتاجة راحة، ممكن تيجي تاخدني؟ بص عاصم لشنطة فريدة الفاضية في الممر، وافتكر إن فريدة هي كمان كانت دايخة امبارح في الحفلة ووشها أصفر، وهو سابها وجري على ياسمين من غير ما يرمش! رد ببرود وقسوة: اطلبي تاكسي. ياسمين اتصدمت: عاصم! مالك؟ ورايا شغل.. وقبل أي حاجة يا ياسمين.. إحنا اتفارقنا من ثمان سنين، ما تتصليش بيا تاني في أمور شخصية زي دي. وقفل السكة في وشها! فتح الأسماء وطلب “فريدة”.. مرة، اتنين، ثلاثة. في المرة الرابعة، جاله الصوت الآلي: “الرقم الذي طلبته غير مستعمل حالياً”. غيرت رقمها بالسرعة دي! اتصل بالمساعد فوراً: احجز لي سويسرا! يا بيه، الهانم طلبت من شركة الطيران السرية على بياناتها. تصرف وهاتها! لازم تلاقيها بأي طريقة! وسكت ثانية وكمل بصوت مكسور: بس.. بلاش تضايقها.. اتأكد بس إنها كويسة.. وهات لي أشطر دكتور نسا وتوليد نسأله.. دكتور نسا يا بيه؟! عايز اعرف.. يعنى إيه حمل في الأسبوع السادس؟ والست في الوقت ده بتتحمل تعب لحد فين؟ لما الطيارة نزلت في زيورخ، كان الثلج بينزل. طلعت شنطتي ورفعت الياقة عشان البرد. التليفون اتهز برسالة من صديق قديم: أنا عند بوابة ثلاثة. رفعت راسي، لقيت أمجد واقف ببالطو بني وبيشاور لي. أمجد.. زميلي من أيام الكلية، والوحيد اللي كان عارف إني بحب عاصم. قرب وأخد الشنطة مني: فريدة! بقالنا ثلاث سنين ما اتقابلناش.. خسيتي أوي! ضحكت: دي أول كلمة تقولها لي بعد الغيبة دي؟ بص لبطني والابتسامة اختفت من وشه: أنتِ حامل بجد؟ أيوه. هو يعرف؟ عرف. وقال إيه؟ سألني: “من مين؟” أمجد اتجمد مكانه، وبعدين ضحك بتهكم: عظيم.. عاصم بيه برضه عبقري في الصدمات! ما حكيتش أكتر، وهو ما سألش. مشي بيا للسيارة: تعالي.. جهزت لك شقة هادية قريبة من المستشفى ومن وسط البلد. اتصدمت: جهزتها من إمتى؟! من أول ما قولتي لي إنك جاية. بس أنا قايلة لك الأسبوع اللي فات بس! يبقى بدأت تجهيز من الأسبوع اللي فات. ابتسمت له.. أمجد ما سألنيش عن الماضي ولا جاب سيرة عاصم، بس قال لي كلمة واحدة: أهلاً بيكي في حياتك الجديدة. وصلنا الشقة في شارع هادي بتطل على البحيرة، وفيها ورد أبيض وفي الثلاجة أكل ولبن. إداني المفتاح، فقلت له: أمجد.. أنا معايا فلوس، تحسب لي الإيجار كام. ضحك: عارف.. سمعت إنك اتطلقتي من ملياردير! مش مجرد كلام.. حقيقة. مبروك للمليارديرة الجديدة! وهو طالع، ناديت عليه: أمجد.. نعم؟ حطيت إيدي على بطني وقلت له: شايفني أنانية إني متمسكة بالعيل رغم إن أبوه… سكت وما عرفتش أكمل. أمجد قعد قدامي وقال بهدوء: فريدة.. أنتِ عايزة الطفل ده؟ عايزاه أوي. يبقى ده يكفي.. بس افتكري، تربية العيل مش فلوس بس، محتاجة صحة ووقت وصبر وسند. “أنا عارف.” “هل أنتِ مستعدة؟” بصيت لبطني، وأخدت وقت طويل أوي عقبال ما رديت: “مش أوي.. بس هستعد.” أمجد ابتسم: “خدي وقتك.. ما حدش جابرك تبقي أم مثالية من أول يوم.” وطيت راسي، وفجأة حسيت بحرقة ودموع في عيني. في الثلاث سنين اللي فاتوا، اتعودت إن ما حدش يسألني أنا عايزة إيه. عاصم قالها بوضوح إنه مش بيحبني، والجدة كل اللي كان هاممها تشوفنا مبسوطين وخلاص، والغرباء ما كانش فارق معاهم غير هل أنا أستاهل لقب “حرم عاصم بيه” ولا لا. ما حدش قعد قدامي وسألني بجدية: فريدة.. أنتِ عايزة إيه؟ أخدت نفس عميق: “أمجد..” “نعم؟” “شكراً.” قام وقالي: “ما تشكرنيش أوي كده.. عندك معاد كشف في المستشفى بكرة الساعة تمانية الصبح، ولو نمتي وتقلتِ هفضل أرن عليكي لحد ما تصحي.” ضحكت: “عارفة.” قفل الباب وساب الشنطة، والهدوء حل في الشقة. وقفت جنب الشباك أراقب الثلج وهو بينزل على البحيرة. طلعت التليفون، فتحت النوتس، وعملت صفحة جديدة سمتها: مذكرات البيبي. فكرت كتير، وفي الآخر كتبت أول سطر: اليوم الأول في سويسرا. وصلت الأم وطفلها بالسلامة. ومن النهاردة.. هنبدأ حياة جديدة. بصيت للشاشة، وحطيت إيدي بالراحة على بطني: “أهلاً يا حبيبي.. يمكن ما أكونش أحسن أم في الدنيا، بس هحاول عشانك.” الثلج كان لسه بينزل برة الشباك. ما كنتش أعرف إن الراجل اللي كان جوزي، واللي بيني وبينه آلاف الأميال، فضّل صاحي ليلتين ورا بعض ما غمضلوش جفن. ولا أعرف إنه بدأ يتعلم إزاي يقرأ السونار، ولا إن عقد الطلاق في درج مكتبه اتفتح واتقفل ألف مرة. بس حتى لو كنت اعرف… أنا كمان ما كنتش هرجع. ياسمين ما كانتش مصدقة إن عاصم بجد عايز يبعد عنها وينهي كل حاجة. ثمان سنين كاملين وهي متعودة إن تليفون واحد منها يخليه يجري يجيلها، ولو طلبت نجمة من السما هيجيبها، وحتى لما سابته وسافرت أوروبا ما ينطقش عنها كلمة شينة قدام حد. عشان كده، لما رجعت مصر ما تخيلتش أبداً إنها ممكن تخسر قدام فريدة. ست اختارتها الجدة، جوازة صالونات وعقد مدته ثلاث سنين.. إيه اللي يخوف في كده؟ بس دلوقتي… عاصم ما بيردش على مكالماتها خالص. قاعدة في شقتها الفخمة تبص للشاشة السودة، وجنبها مديرة أعمالها هالة. “ياسمين.. أنتِ بجد مكملة في الجنان ده؟” رفعت ياسمين راسها ببرود: “ناوية على إيه؟” هالة اتنهدت: “أنتِ لسه راجعة البلد، وشغلك ومستقبلك في مرحلة حاسمة.. بلاش تدخلي المشاعر في السكة وتخربي على نفسك.” ياسمين ضحكت بمرارة: “أنتِ فاكرة إني رجعت مصر عشان شغلي؟” هالة سكتت، فكملت ياسمين وهي ماسكة التليفون بغل: “أنا سيبت عاصم زمان عشان فاكرة إني هبقى نجمة عالمية.. بس بعد ثمان سنين اكتشفت إن ما فيش راجل عاملني بالنظافة والحب ده غيره.” هالة بصت لها وسألتها: “ولا عشان ما فيش راجل تاني بثرائه ونفوذه؟” وش ياسمين اتغير: “هالة!” ردت هالة بهدوء: “أنا بفكرك بحاجة واحدة بس.. عاصم كان متجوز، وحتى لو اتطلقوا، ده مش معناه إنه هيرجعلك.” ياسمين ضحكت بثقة:….يتبع للجزء الثاني لست حبيبتي بقلم الكاتبة نرمين عادل همام ياسمين ضحكت بثقة: “أنتِ مش فاهمة عاصم. ده عاش يحبني ثمان سنين، مستحيل ينساني.” مسكت شنطتها: “هاتي العربية.” “على فين؟” “بيت عيلة عاصم القديم.. هروح للجدة.” الجدة كانت قاعدة في الصالة، وجنبها علبة الأدوية. وشها كان تعبان بعد حفلة عيد الميلاد. أول ما دخلت ياسمين، رفعت راسها ببرود: “خير؟” ياسمين ابتسمت بنفاق: “يا تيتة.. سمعت إنك تعبانة فجيت أزورك.” الجدة بصت لها بصرامة: “أنا مش تيتة حد.. ويا آنسة ياسمين، أنتِ مشيتي من ثمان سنين، محدش لامك على اختياراتك وشغلك، بس ما كانش ينفع ترجعي في الوقت اللي عاصم بدأ يظبط فيه حياته وتخربي كل حاجة.” عينين ياسمين احمرت: “أنا ما كانش قصدي.. أنا بحبه!” الجدة سألتها بمرارة: “أنتِ عارفة يعني إيه بتحبي حد؟” “يعني لما يقع تقفي جنبه مش تسيبيه وتجري.. لما يتعرض لأزمة ما تديش ظهرك له.. ولما تعرفي إنه اتجوز تحترمي بيته ومراته وتقفي عند حدك!” حطت الجدة كباية الشاي وقالت بقسوة: “أنتِ بتحبي نفسك يا ياسمين.. ومش حبك ده اللي يدي ليكي الحق تؤذي الناس.” ياسمين اتعصبت: “أنتِ دايماً بتفضلي فريدة عليا!” الجدة ما أنكرتش: “أيوه، بصعب عليا البنت.. لما العيلة مرت بأزمة فريدة ما سابتناش، ولما عاصم اتقال عنه كلام في الصحافة فضلت واقفة جنبه، وعاشت ثلاث سنين في البيت ده من غير ما تاخد حقها كزوجة! أنا اللي غلطت لما افتكرت إن الوقت هيخلي عاصم يفهم ويلين.. ودلوقتي أنتِ وهي أذيتوها.” قامت الجدة وقالت: “تقدر تتفضلي.. وما تجيش هنا تاني.” في اللحظة دي، سمعوا خطوات برة، وعاصم دخل من الباب. ياسمين جرت عليه بلهفة: “عاصم!” بس عاصم عدى من جنبها وكأنها هوا، وراح لجدته: “تيتة..” “جيت يا عاصم؟ فين فريدة؟” السكون حل في المكان. عاصم وطي راسه: “سافرت.. سويسرا.” الجدة مسكت السور بحدة، وفجأة رفعت إيدها ثم أنزلتها بحزن على كتفه. صوت اليد على الكتف هز المكان. ياسمين حطت إيدها على بقها بمفاجأة، وعاصم فضل واقف مكانه مش بيتحرك. الجدة صوتها كان بيترعش من الوجع: “فريدة عملت فيك إيه؟ كصرت في حقك في إيه؟” عاصم بصوت بحوح: “ما عملتش..” “أنا اللي غلطت يا تيتة..” الجدة هزت راسها بدموع: “فيه غلطات مش بيصلحها الأسف يا عاصم.. أنت مش هتعرف قيمة اللي كان في إيدك إلا لما تفقده خالص.” عد ثلاثة أيام، المساعد طارق دخل مكتب عاصم ومعاه ملفات. “عاصم بيه.. ده سجل الكاميرات كله ليلة حفلة رأس السنة.” عاصم رفع راسه: “لقيتوا الفيديو؟” “أيوه يا بيه.. بس فيه حاجة غريبة أوي.” طارق حط التابلت قدامه. الفيديو كان مبين عاصم وهو طالع من الحفلة، خطواته مش مظبوطة أوي بس عينيه كانت صاحية ومركزة. مسك تليفونه وطلب فريدة.. المكالمة استمرت دقيقتين و17 ثانية. فضل واقف مستنيها قدام الفندق، وبعد ربع ساعة جت فريدة بمعطف بيج. أول ما شافها، مد إيده لها.. مش عشان متوازنش، ده هو اللي بادر وأخد إيدها! عاصم كان باصص للشاشة وإيده بتترعش. في الفيديو التاني من جراج الفيلا، فريدة نزلت وفتحت له الباب، وقفت قدامه وسألته حاجة، فقالت كلام خلي فريدة تبتسم ابتسامة حقيقية من قلبها.. ابتسامة أول مرة عاصم يشوفها! وبعدها عاصم مال عليها واحتضنها بالراحة وبمنتهى العفوية. عاصم وهو باصص للشاشة، بدأت الذكريات ترجعله كقطع مكسورة.. صوت فريدة وهي بتقوله: “أنت تعبت كتير.” وهو ماسك إيدها وبيسألها: “عارفة أنتِ مين؟” وهي ترد: “مين؟” فيقولها: “فريدة..” وتسأله تاني: “وعارف إيه اللي بيننا؟” فيقولها: “مراتي.” وافتكر الجملة اللي حاول يمسحها من دماغه طول الست أسابيع اللي فاتوا.. الجملة اللي قالها لها وهو ضاممها لصدره: “فريدة.. ما تمشيش.” عاصم قام فجأة من الكرسي، والكرسي انزلق للخلف! التنفس بقى صعب والذكريات بتدفن عليه.. الليلة دي ما كانش غايب عن الوعي! كان عارف كويس أوي إن دي فريدة مراته، وهو اللي بادر بالقرب وهو اللي نطق اسمها.. ولما صحي الصبح، كل اللي قاله لها: “أنا آسف!” قعد عاصم بالراحة وحط إيده على وشه. افتكر الصبح ده لما فريدة كانت قاعدة جنب الشباك والشمس ضربة في كتفها وسألته: “عاصم.. فيه حاجة عايز تقولها لي؟” وهو سكت عشان كان خايف! خايف تفكر إنه عايز يغير الاتفاق، وخايف يواجه مشاعر مش فاهمها! فكتفى بإنه يقول: “آسف.” فتح عاصم الشات بتاع فريدة، كانت أخر رسالة منها يوم ذكرى جوازهم الساعة 6:12 مساءً: فيه حاجة عايزة اقولهالك الليلة دي. وهو ما ردش عشان كان لسه سامع خبر رجوع ياسمين! ودخل الساعة تسعة بالليل قايلها ببرود: “ياسمين رجعت.” قطرة دموع نزلت من عين عاصم على شاشة التليفون.. ولأول مرة في حياته، قعد الراجل المغرور ده يعيط. بعد شهر من وصولي سويسرا، بدأت أرجع لحياتي وشغلي. أنا دراستي كانت هندسة ديكور ومعمار، وقبل الجواز جالي عرض شغل في أوروبا بس رفضته عشان الجدة كانت عايزة الجواز يتم بسرعة. طول الثلاث سنين اللي فاتوا كنت باخد مشاريع صغيرة أونلاين عشان ما أنساش شغلي. أمجد عرفني على شركة معمارية في زيورخ، والمديرة إيلينا راجعت شغلي وقالت: “أنتِ قاطعة شغل من ثلاث سنين؟” “أيوه.. عشان الجواز والعيلة.” “المبلغ والشغل حلو بس ثلاث سنين مش قليلين.. هتبدأي من مشروع تجديد قرية سياحية، موافقة؟” “موافقة جداً ومش مستصعبة حاجة.” طلعت من الشركة والشمس الشتوية مالية الشارع. صورت السماء بنقاء ورفعتها على صفحتي اللي كانت مهجورة بقالها ثلاث سنين، وكتبت: بداية جديدة. من غير ذكر أسماء ولا شكوى ولا دراما.. سماء زرقاء وبس. ما كنتش أعرف إن بعد عشر دقائق بالضبط، الصورة دي هتوصل لتليفون عاصم، وهيحفظها ويعملها خلفية لموبايله! في الليلة دي لما رجعت الشقة، لقيت بوكيه ورد ورد كاميليا أبيض محطوط قدام الباب ومعاه كارت مكتوب فيه: آسف. من غير إمضاء. طلبت الرسبشن وقلت لهم ببرود: “من فضلكم رجعوا البوكيه ده للي بعته.” “يا فندم هو دافع حقه!” “عارفة.. بس أنا ما قبلتوش.” قفلت ودخلت شقتي، والتليفون رن برقم دولي. رديت: “ألو؟” الطرف التاني سكت كام ثانية، وبعدين جه صوته المبحوح: “فريدة..” نطق اسمي بهدوء يرعب، وكأنه خايف لو عليّ صوته هقفل في وشه. “أزيك يا عاصم؟” سكت شوية وبعدين سأل: “أنتِ عاملة إيه؟” “كويسة.” “والبيبي…؟” “بخير.” تنفسه تقل أوي: “فريدة.. أنا عرفت.. افتكرت كل حاجة في الليلة دي.” بصيت لانعكاس وشي في زجاج الشباك: “بجد؟” “أنا آسف يا فريدة..” ضحكت بمرارة.. كلمة “آسف” دي سمعتها منه كتير أوي! ليلة الزفاف اعتذر إنه مش هيعرف يحبني. بعد الليلة اللي قضيناها مع بعض اعتذر إنه اتعدى الحدود. ودلوقتي بيعتذر تاني! قلت له بهدوء: “عاصم.. أنت عارف كلمة آسف دي سمعتها منك كام مرة؟ أول مرة أشوفك صعبان عليك نفسك، تاني مرة قولت يمكن مكسوف، بس المرة دي.. أنا تعبت.”
